【祥嫂病逝】黃夏蕙聞好友離世感心痛:佢話戒晒煙同咖啡

更新時間 (HKT): 2019.07.02 20:55

黃夏蕙接受《蘋果》電話訪問:「我去美國前,5月22號去佢屋企見過佢,當時佢仲出花園同我傾偈,聽到佢有兩聲咳,叫佢快啲返入去,當時佢好瘦,精神唔係幾好。」問到知道祥嫂患癌嗎?夏蕙姨表示:「佢冇講,不過上次通電話,佢話戒晒煙戒咖啡!」

當知道祥嫂今日病逝後,談到兩人相處最深刻事件,夏蕙姨說:「祥嫂17歲識我,我哋識咗好多年,當年佢日日燉燕窩畀祥哥食,又去女人街買毛巾,佢同祥哥成日行去電車路食消夜,唔搭的士,慳儉係佢美德。」

當夏蕙姨去到美國後,收到祥嫂入院消息,即時致電找她,但一直聯絡不上,夏蕙姨說:「其實上周我喺美國都聽到佢病危,馬上求證,虛驚一場,今日接到朋友通知佢死訊,好唔開心,畢竟我哋幾十年好姊妹,最難忘係陪祥嫂捱過爭產嗰段日子。」

黃夏蕙續說:「祥嫂其實好錫啲仔女,佢相夫教子,當年我睇到祥嫂同仔女爭產,佢好悽涼,一家人為錢搞到咁,真係好唔值,而家祥嫂到頭來又係一無所有,啲錢都留畀仔女。記得佢哋兩次爭產,其間好番時,祥嫂有同我講話仔女對佢好,每月畀佢4萬家用,囡囡又送佢20萬名牌手袋。仔女又畀佢銀行信用卡,嗰段時間關係好好。」黃夏蕙表示祥嫂雖然有錢,但平日生活節儉,不捨得花費,她希望兆尊等幾名子女,為祥嫂風光大葬:「讓佢生榮死哀。」

黃夏蕙痛失幾十年閨密,她形容此刻心情:「好痛好痛,由佢入院後,我冇日瞓得好,知道佢死訊,而家欲哭無淚,個心好唔舒服,今日開始,我會為祥嫂齋戒一周,晏啲會喺呢度同佢去廟上香。」

據知黃夏蕙有意更改在美國探親及登台行程,提早返港,協助祥嫂後事。

娛聞樂陪你走遍全球追星,即Like「娛果」FB 專頁!
BannerBanner