【下周四設靈】祥嫂生前叮囑莫結婚 鄧兆尊:我梗係答應佢

更新時間 (HKT): 2019.07.03 16:30

已故名伶新馬師曾鄧永祥遺孀祥嫂洪金梅昨日離世,終年73歲,其子鄧兆尊經歷喪母之痛,心情很沉重。《蘋果》今日致電兆尊,問及祥嫂的後事安排?他表示:「喪禮定咗本月11號喺香港殯儀館設靈,12號出殯!阿媽臨終已經安排好後事,會喺哥連臣角火化,喪禮會採用西式,因為佢怕嘈!」

有傳祥嫂留下15億港元遺產給子女,他說:「我從來冇問過佢身家啲嘢,亦都唔知佢有冇立遺囑,至於佢有幾多錢身家,我真唔知道,因為同佢分開咗咁多年,所以冇過問佢嘅財產。佢身家點分配,我唔關心,而家只係想盡快搞好佢嘅後事。」

問到幾時知道媽咪患肺癌?兆尊表示:「佢今年初先知,然後先話畀我哋知,雖然有不斷幫佢搵名醫去治療,但病情進展好急,呢一年我哋可以做嘅係盡量陪喺佢身邊照顧佢,一個月前佢同我講,叫我千祈唔好結婚,保持現狀就好,我嗰時答應佢,佢就好滿意。」

當年發生爭產事件,兆尊四兄弟妹與祥嫂關係弄得很僵,到今時今日,母親病逝,財產還是留回給子女,問兆尊會否覺得好諷刺?兆尊說:「祥嫂其實係一個外冷內熱,把口兇個心係冇乜嘢嘅人,當年可能係為咗爭一口氣搞成咁,我覺得阿媽有啲似林鄭月娥,有時明知自己做錯咗,但為咗面子,點都要堅持,唔肯認衰。」

兆尊強調這麼多年來,其實他對母親是無怨無恨,反而弟妹對祥嫂很有意見,他就充當中間調停人,希望能緩和弟妹與祥嫂之間的矛盾:「她始終係10月懷胎生我哋出嚟,上一輩嘅事,我哋做後輩嘅不應該去評價,而且人都不在啦!仲有乜嘢恩怨呢!」

娛聞樂陪你走遍全球追星,即Like「娛果」FB 專頁!
BannerBanner