【損毀大閘再扑爆玻璃】黃寶欣餅店接連遭刑毀阻營業 案發前曾落舖巡視

更新時間 (HKT): 2019.07.05 17:26
(資料圖片)

黃寶欣與友人合資於九龍城開設的蛋撻餅店,繼上月遭人淋潑腐蝕性液體刑毀後,今日中午1時多再遭一名男子持鐵鎚扑爆餅店玻璃櫥窗,一幅1米乘2米的櫥窗應聲粉碎;《蘋果》即時聯絡寶欣了解,她亦無奈表示不知道原因。

其實,餅店早於上月11日,已遭人淋潑腐蝕性液體致大閘損毀,當時寶欣估計涉及員工糾紛,今日她受訪時表示:「今日12點幾我同囡囡去完美國領事館,我就返咗落舖頭擺低啲嘢,順便巡下同啲同事傾下偈,然後就返屋企準備帶隻狗仔去沖涼,就收到拍檔電話,話舖頭俾人爆玻璃。」

寶欣指拍檔已經落完口供有跟她聯絡,但大家都不知道發生甚麼事,甚麼人做。她嘆謂:「上次都係估糾紛啫,都只係諗下,但就算係,係咪去到咁仇恨呢?」問寶欣可知道維修要多久?她表示:「我好多嘢都未知,新聞都係啲同事send畀我,所以我都要了解下。」

娛聞樂陪你走遍全球追星,即Like「娛果」FB 專頁!
BannerBanner