【逆權運動】何韻詩投訴一國兩制失效 預咗發言被中方打斷:佢哋都係講廢話

更新時間 (HKT): 2019.07.08 22:26

何韻詩今日在日內瓦出席聯合國理事會的常務會議,發表2分鐘演講,控訴香港自由已逝,一國兩制近乎死亡,其間被中國代表兩度打斷發言。

阿詩完成演講後接受《蘋果》電話訪問,對於被中方打斷發言,她說:「其實就預咗,佢哋一般有關大陸嘅發言,佢哋會用呢種手段打亂你,嘗試令你唔可以講任何嘢,因為我講緊香港嘅問題、一國兩制,佢哋點樣干擾香港嘅自治部份,佢第一個投訴,話我將香港同大陸放喺同一個level,其實就唔係,當然佢哋只係搵辦法嘗試去中斷,好彩副主席冇中計。」

阿詩坦言早有心理準備:「當然有少少緊張,喺呢啲咁大場合,同我準備成個演講嘅朋友,過往都有咁嘅情況出現過,已經畀咗少少心理準備我。」

阿詩完成演講離場後,中方代表再舉手發言,阿詩不屑說:「佢哋都係講咗一堆廢話,簡單講就係一國兩制係好完善地喺香港進行緊,香港人完全被照顧到,香港內政純粹係大陸嘅事情,佢哋都有再講番逃犯條例已經暫緩,同埋再去攻擊番立法會有人衝入去之類,都係嗰啲廢話。」

問到現場有否跟其他國家人士交流,有否談及香港情況?阿詩說:「暫時未係好接觸到其他人,因為大家都好忙住講嘢,其實聽日我都走,所以睇下呢段時間,可唔可以同聯合國嘅高層或有勢力嘅單位,講多少少香港嘅情況畀佢哋聽,因為我諗呢件事嘅重要性,係要畀大家知香港嘅情況,唔係大陸講到咁好。」

阿詩坦言:「我諗大陸喺聯合國有一個好強勢角色,所以好多聲音冇喺呢度出現到。當然我最後有要求聯合國可唔可以有一個緊急會議for香港人,但當然做唔做係佢哋問題,始終要畀呢度世界各地嘅人知道香港情況係咁樣,對我哋嘅抗爭係有幫助,後來都有幾多呢邊嘅傳媒有興趣再問多少少,同埋想知道香港嘅情況。好多人以為逃犯條例暫緩已經得,我要解釋番畀佢哋知唔係,呢個只不過係政府嘅手段,我哋點解仲咁辛苦繼續喺條街,就係因為過往十幾二十年,香港嘅變化同發生嘅事,好多人都唔知道,所以盡量講得幾多得幾多。」

問到覺得今次出席會議有冇作用?阿詩說:「喺一個比較國際嘅平台上,令唔同國家比較重要嘅人可以知道香港真正情況,中國大陸喺內政入面做緊好多好差同侵犯人權嘅嘢,所以作用唔係即時見到,等於我哋喺香港街上去抗爭,都係一步一步慢慢儲返嚟,喺呢度其實都一樣,我唔會期望佢哋聽日即刻開緊急會議,當然要開都一早開咗,起碼用一個強硬啲態度去詢問人權委員會,究竟點解佢哋仲冇人去做任何嘢,關於中國大陸咁多違反人權嘅事情,點解佢哋仲可以坐喺呢度呢?呢個係我最後發出去嘅問題,我諗作為聯合國嘅代表,應該捍衛人權嘅組織,其實佢哋有責任保護世界各地嘅人權。」

娛聞樂陪你走遍全球追星,即Like「娛果」FB 專頁!
BannerBanner