【反紅媒】譚俊彥直言藝人好難做 龔嘉欣冇留意馬明商場騷被噓

更新時間 (HKT): 2019.07.15 17:36
馬國明昨日出席活動上台時,被示威者噓爆,現身不足兩分鐘由警方護送離場。

無綫新聞近日報道反送中示威遊行被指內容偏頗,引發網民極度不滿,發起抵制TVB廣告客戶,同時又發起「反紅媒」圍TVB商場騷,藝人馬國明昨日出席活動時,便有逾百示威者手持反無綫新聞標語到場大叫口號,今日譚俊彥、張振朗、曹永廉、胡定欣及龔嘉欣等,於3點幾在電視城舉行新劇《包青天再起風雲》宣傳。

曹永廉沒接受訪問,龔嘉欣被問有否留意網民抵制TVB,藝人出活動被噓一事,龔嘉欣回應:「未睇呀!因為我拍《大醬園》今日煞科,已經即刻過嚟呢度,噚日要開工,所以冇時間睇,我覺得做好自己,做好份內事,每個人都有表達自己想法嘅方法,我哋唯一做到嘅都係做好自己。」會否覺得有人逼藝人去表態,龔嘉欣直言:「冇!又冇喎!我覺得唔會存在呢一樣嘢(最近微博或社交網會否更小心發言?)冇,因為我開緊工,變咗分享都係工作上嘅嘢。」

問到會否怕影響接商場騷,龔嘉欣說:「冇諗呀!我只係覺得拍完一套劇即刻鬆一口氣,拍咗4個幾月,每日日曬雨淋嗰隻,你會覺得鬆一口氣。」會否同情馬國明的遭遇,龔嘉欣講:「我冇睇!我真係冇睇,噚晚拍到通宵,所以我冇乜留意呢件事。」

同場的譚俊彥及張振朗接受訪問時,譚俊彥指尊重公司的決定:「做一個藝人,唉!好難做。」張振朗無奈說:「冇緊要,咪唔出(活動)住囉。」譚俊彥笑言天氣熱返公司涼冷氣都好,張振朗就指視乎情況而定,譚俊彥續道:「但我哋都好希望近距離同觀眾接觸,以我哋做宣傳咁耐,我哋研究到……我覺得喺街市嘅地方,最多街坊朋友見到我哋就最開心,不過唔緊要嘅,平時我都會去街市買餸,大家都會見到我嘅,所以OK!」

娛聞樂陪你走遍全球追星,即Like「娛果」FB 專頁!
BannerBanner