【首映撞正圍新城市】袁澧林認約炮警察係舊愛 梁詠琪:唔擔心去戲院

更新時間 (HKT): 2019.07.16 22:00

前日反送中沙田大遊行發生警民衝突,警察衝入新城市廣場驅趕示威者,嚇親群眾,今晚7時半大批市民圍商場詢問處抗議,要求新地交代事件;剛巧由任達華、梁詠琪、郭晉安、楊采妮等主演電影《小Q》,原定今晚8時在新城市舉行慈善首映禮,昨日電影公司收到商場通知,指不建議首映在廣場內舉行,故臨急改在沙田帝都酒店舉行記者會,首映則在MCL Movie Town戲院放映。大會指眾演員、嘉賓會步行去戲院睇首映,不用經新城巿廣場。

有份演出的袁澧林在電影內扮演楊釆妮女兒,日前網傳有警察將深水埗警署變「炮房」,有指該名「約炮」警察的舊愛是袁澧林,袁澧林今日出席記者會時被問到對方是否前男友?她承認:「係呀。」問到分手原因,袁澧林卻避答:「已經回應咗。」問對方曾否邀請到奇怪地方?她繼續封嘴:「已經回應咗,唔再回應。」

此外,由於舉行記者會的酒店地點近新城市廣場,問知否有市民圍廣場及會否去睇首映?她說:「因為聽日一早07要開工,所以今晚唔會去睇首映。」問到會否擔心首映活動受影響?她說:「唔擔心,因為大會工作人員會安排。」梁詠琪則說:「其實都唔擔心,今日係慈善首映,買飛入場都係善長,我哋都會去戲院答謝觀眾,自己本身今日冇諗住睇,但都唔擔心去戲院。」她指之前睇過試片好感動,叫大家一定要帶紙巾入場。

至於任達華和羅仲謙就表示會去睇首映,但就避談政治話題,華哥說:「今晚會去睇戲,今晚講番電影,希望好似部戲咁,愛與包容、愛與忠誠。」而羅仲謙被問到會否擔心市民圍新城市?他說:「學華哥話齋,我哋今日講番呢部戲,電影係宣揚愛,世界有愛會包容多啲。」他指鼓勵大家做狗隻寄養家庭,自己許可有條件都會做。

而任達華在戲中扮演失明人士,拍完戲後今日再跟導盲犬見面,希望待牠退休後可以領養,剛見面狗仔好興奮,舔到他滿面口水。提到女兒在微博貼相騷長腿,他指女兒為雜誌影封套,讚女兒腿長似囡囡:「比例好過我。」雖然女兒開通微博,但華哥不鼓勵她入行:「拍戲要捱夜冇得瞓,我想自私啲留佢喺身邊,不過可以試吓做model,所有父母對仔女都係愛錫,希望佢揀讀者為主。」

娛聞樂陪你走遍全球追星,即Like「娛果」FB 專頁!
BannerBanner