【任達華中刀】黃浩然傳短訊問候華哥:睇新聞毛管都戙

更新時間 (HKT): 2019.07.20 16:40

任達華今日在中山突然遇襲,在台上遭背心男子用刀刺傷腹部,腹部中刀後,任達華手捂傷口,手上沾滿鮮血,仍保持冷靜說:「去醫院!」

黃浩然今出席書展活動時,對於任達華在大陸出活動時被刺傷,他說:「睇到新聞毛管都戙,已經傳咗訊息畀華哥,但唔想騷擾佢,淨係傳短訊問候,睇新聞覺得好震撼,希望佢早日康復,佢真係睇住我大,睇住我入行,我入行已經同佢拍戲,好多部戲都係同佢合作。」

問到去大陸時會否擔心安全問題?他說:「朋友有叫我小心,但有啲嘢好難避免,出去做嘢真係要打醒精神,留意自身安全。」會否與陌生人保持距離及少點接觸?他說:「會小心啲,相信公司都會安排,冇得諗太多。」至於會不會請保鑣保護?他說:「冇咁嘅需要,相信大會會安排,自己小心啲就得。」

曾在活動上,以及在電影拍攝場地遇過華哥的陸詩韻,對於華哥被刺傷,她表示最初最初看到新聞的時候,還以為是假,後來才知道原來華哥真的被刺傷:「希望人冇事,大家亦唔好猜測、估計咁多,就算喺邊個地區做嘢都好,大家都可能會遇到突發事情發生,所以出去做嘢要小心啲。」

對於華哥今次受傷新聞,是否嚇一嚇?陸詩韻說:「都會,但有時啲嘢好難防備,又唔可能唔出去做嘢,就算行街都會有危險啦。」至於之後工作是否會跟主辦商研究保安問題?她說:「都會,呢啲交畀公司傾啦,突然間有人衝上台,人多嘅地方可能就會有混亂情況,當生命冇受影響之後,應該就要問番保安公司發生乜事,跟住就要傾下次盡量小心避免。」

採訪:王連連

娛聞樂陪你走遍全球追星,即Like「娛果」FB 專頁!
BannerBanner