【銷量排第三】KOLOR出書講內心感受 望有機會再出書

更新時間 (HKT): 2019.07.20 16:26

樂隊KOLOR今日到灣仔書展,為其推出的「THE KOLOR BOOK」舉行簽名會,KOLOR表示今次是他們推出的第一本書,是為了配合稍後的演唱會,有靚相之餘,書中收錄9首歌的歌譜,亦有他們以文字寫內心感受及作曲時的背景等。

KOLOR指若然好彩的話,希望下年再開演唱會時可以再出書,問到是否知道銷情,他們說:「據書商講,今日(銷量)排行榜升咗一級,已經升到第3位,其實之前預售演唱會飛時,有啲朋友已經預購咗呢本書。」

提到書內的照片,他們指除了有為今次特別去影的新相外,亦有他們以前的舊照:「特別Hard disk度搵出嚟,用咗大約半年時間。」但他們卻指花最多時間,是在樂譜方面,因為要先默寫然後輸入電腦再做校對:「好多樂隊都話我哋好犀利,因為好難默寫番晒出嚟,最緊要唔好有錯,呢一part係最認真,相信下次再做呢啲project時會更有信心。」他們又謂經過今次後,以後不需再重新寫樂譜,教學生時會更方便。

昨日KOLOR主音Sammy的老婆盧巧音,為鄭秀文演唱會擔任嘉賓,與老婆一同到場的Sammy笑言:「Sammy去Sammi演唱會度睇騷,成晚全場人喺咁叫我個名,我好尷尬,我覺得Sammi演唱會好好睇,同埋隊樂隊好犀利,鐵樹蘭都好好睇。」

娛聞樂陪你走遍全球追星,即Like「娛果」FB 專頁!
BannerBanner