【無警時分】YouTuber大J呼籲同行發聲:有解約金要畀嘅,我幫你畀!

更新時間 (HKT): 2019.07.22 15:20
(FB圖片)

元朗昨晚有大批白衣暴徒,無法無天任意追打市民,惟警員卻疑坐視不理,最後更未有任何施暴者被捕。除了眾多藝人難忍怒火發聲之外,KOL界別當中亦有Youtuber大J呼籲同行站出來,並稱「如果你係因爲同現有公司合約,或公司不容許你發聲嘅,而你係想發聲嘅,同我講,如果有解約金要畀嘅,我幫你畀!」

大J今日中午撰寫長文,呼籲各界KOL、Youtuber等站出來,表示「我哋係有責任做正確的事,將正確嘅思想傳達落去。」又稱「而家唔企出嚟,香港真係會玩完」。而身為KOL之一的Rose Ma(馬俊怡)亦有留言:「唔好淨係youtuber , beauty blogger 都係呀!」

大J呼籲全文如下:

「To 所有香港YouTuber:

自6月頭開始,圍繞逃犯條例修訂,香港不斷發生大大小小不公義事件。你可能希望保持中立,保住自己飯碗,而一直不發聲。又可能因爲你所屬公司屬於中資,或與中資有關聯而不敢,或不能發聲。

無論原因係點,我希望你哋所有人明白,作爲一個有知名度嘅人,雖然並不一定要為各大事件表態,但經過政府一再無視民意,市民喪生,警方選擇性執法...同埋尋晚嘅元朗恐怖襲擊事件,你仲可以保持中立?你仲可以唔利用自己嘅影響力,去做啲嘢?!

尋晚我12點完左直播之後,一路睇新聞直播一路流眼淚,睇住中環啲警察對年輕人一槍接一槍咁開;元朗黑幫無差別打人,老人家打,大肚婆又打!睇住個抱住BB嘅媽媽嚇到尖叫,爸爸跪低求啲黑幫唔好打!

香港YouTuber,如果你見到呢啲畫面之後,仲可以為左少少嘅錢,而埋沒自己良心嘅,恭祝你財運亨通,繼續發財。

如果你係因爲同現有公司合約,或公司不容許你發聲嘅,而你係想發聲嘅,同我講,如果有解約金要畀嘅,我幫你畀!

JASON」

娛聞樂陪你走遍全球追星,即Like「娛果」FB 專頁!
BannerBanner