【見人就打】莊端兒唔敢入元朗:咁大個女未見過警署會落閘

更新時間 (HKT): 2019.07.23 20:20

鄧月平和莊端兒今日在九龍灣拍攝一個有關校園的節目,鄧月平表示難忘一位女同學為她做的事,「我哋嗌咗交,點知佢打工賺錢,買咗一個好貴嘅公仔氹番我。」提到初戀,鄧月平表示18歲後才拍拖,她說:「我父母關係唔好,所以媽咪喺產前產後都有抑鬱症,大部份時間都要照顧媽咪,同埋媽咪唔鍾意我喺中學拍拖,建議我大個先,怕我細個會畀男仔呃。」

至於莊端兒表示讀小學時曾有撞鬼的經歷:「嗰間小學喺深水埗,音樂室好猛鬼,有日黃昏放學,我哋三個同學唔知死衝上音樂室,點知喺樓梯度已經聽到啲聲,轉頭聽到步操聲,又有一浸涼風,我哋就嚇到碌都甩埋,嗰刻真係好驚,後尾知道嗰間學校以前係被日軍佔領過。」提及中二拍拖,莊端兒指這位男友靚仔又高大,兼且跟她住得很近:「每朝都會約埋一齊返學,佢又會買埋早餐等我,而家諗番都覺得好甜。」

此外,對於元朗有白衣人追打市民,莊端兒說:「我住九龍區,但當晚一直睇住Facebook,真係覺得好擔心,點解會發生呢啲事,我嘅留言係激動咗少少,我無求證過嗰個女人係咪大肚,但係嗰一刻會諗點解連女人都會打。」至於警署落閘,她續說:「我咁大個女都未見過,我唔知『山竹』嗰次有冇落(閘),我真係講真,講番人話,如果因為天氣,開工危險而落閘,我覺得正常,但市民係要幫助,我見到好多見義勇為嘅市民衝出去,唔好理邊一方,但點解要打人呢?(敢唔敢入元朗?)真心,唔敢!如果連女仔都打,唔講咩顏色,我都會搭車經過,都會衝入嚟打,我真係會驚。」

娛聞樂陪你走遍全球追星,即Like「娛果」FB 專頁!
BannerBanner