【閨密爆料】Steven 與April上周仍有親密關係 男方每月欠租$15,000

更新時間 (HKT): 2019.07.26 16:58
(讀者提供照片/IG圖片)

34歲BOYZ成員張致恒(Steven)昨日公佈組織新家庭,情歸女粉絲雯雯,女方奉子成婚。雙喜臨門本來可喜可賀,不過因舊愛舞台劇演員梁皓恩(April)留言踢爆Steven劈腿,令他迅即被封「賤男」。

April好友X小姐今日向《蘋果》爆料:「我係April嘅好朋友,我亦見過張生好多次,一向都睇唔出有咩問題,淨係知佢成日都要喺大陸拍劇,陪唔到April,當然全部嘅重要日子都陪唔到啦,好多時候都係我陪April一齊。今年4月5日I Love You Boy'z紅館演唱會,都係張生畀飛我哋兩個入去睇,當時仲係女朋友身份入去,Kenny(關智斌)都見到。之前仲有成日見面食飯,上星期張生搵完April,大前日都仲有見面食飯。但係我覺得最有問題就係一路以來最近都係April交租,佢哋喺灣仔同居,每個月15000蚊租,張生一直都話自己拍劇未出糧,要April交住先,當然一直都冇畀番佢啦,April都係做freelance,每個月15000蚊對佢嚟講已經好吃力,我好心痛佢真係人財兩失。」April力斥Steven欠債,相信就是X小姐所指的事。

X小姐今日接受《蘋果》電話訪問時,她表示April現在情緒仍然不穩並說:「佢唔食嘢、唔肯出門口,我哋噚晚開始陪住佢,24小時睇實佢,唔敢畀佢一個人,怕佢會做傻事,佢真係接受唔到,佢同Steven上周才有親密行為,我哋一直以為April係正印,即使Steven畀人影到同第二個時,Steven解釋話fans好熱情,我哋都信佢。」X小姐指以April現在情緒必須看醫生,但她不肯出街,X小姐說:「我哋聯絡咗April媽咪,準備呢兩日要帶佢睇醫生。」至於Steven過去兩年跟April同居時,一直由女方支付租金,X小姐說:「Steven起碼爭April幾萬蚊。」

出道18年的Steven情史一大堆,他多次都是偷食致分手,Steven於2016年與舞台劇演員梁皓恩(April)公開戀情,當時還讚女友令他變得成熟,但今年Steven又被揭有新女,盛傳背April偷食,最終他跟April分手。當Steven開心share一家三口相時,同時傷害了April,原來April這段時間跟Steven未斬纜,難怪她接受不到新娘不我,還在Steven的一家三口相上留言:「我呢?你會唔會覺得你有嘢要同我講?你想逃避到幾時,一個電話都唔面對?你所有衫褲鞋襪同所有嘢都仲係我度,你嗰啲愛我嘅message呢?先幾日仲有喎?你仲爭我好多錢,right?你唔打俾我嘅話,醫院見。」結果不少好網友及友人留言苦勸。

娛聞樂陪你走遍全球追星,即Like「娛果」FB 專頁!
BannerBanner