【13歲做電影筆記】馮德倫單打獨鬥再拍美劇 步入中年驚見有老花

更新時間 (HKT): 2019.07.29 06:00

近年在美國發展的馮德倫(Stephen),繼《荒原》(Into The Badlands)之後,最近再為美劇《五行刺客》(Wu Assassins)擔任導演。有別於上次《荒原》,今次沒有好兄弟吳彥祖的參與,亦沒有香港的班底,可說是他一個人單打獨鬥。入行超過廿年,今年44歲的Stephen坦言漸漸感到生命不是永恆,尤其身體方面,他還自爆已有老花,還與好友吳彥祖看字時,鬥拉遠。

早前Stephen在柴灣接受《蘋果》訪問,談到今次美劇《五行刺客》,由幾位導演分擔拍攝,負責拍頭兩集的Stephen坦言︰「今次我單拖去做,而且係由我開始拍套劇,要畀多啲時間做準備。由你開始,往後嘅導演,就會跟住你個tone去拍,比較大壓力。」今次男主角是印尼籍的伊科烏艾斯(Iko Uwais),他自小學功夫,更是一位搏擊手,精通印尼傳統武術,且以快、狠、準見稱。Iko在劇中拳拳到肉,Stephen說︰「以實打為主都幾暴力,但今次喺Netflix平台播出,好處係呢個平台唔介意有血腥、暴力嘅鏡頭。好彩我哋嘅拍攝過程好順利,團隊只有少少擦傷、瘀傷之類,托賴冇特別意外發生。」

本身熱愛功夫,偶像是李小龍的Stephen,今次他在劇中有何動作元素?他說︰「我好喜歡武術,主要嚟講我導演嘅戲,喜歡有動感,但唔一定係武術,好似追車、跳舞、槍戰都係動感,我覺得港產片,就係有呢種動感。」Stephen談到拍美劇與拍港片的分別,他說︰「喺香港同內地,導演話事會多啲,但喺美國以監製或studio嘅阿頭為主,因為佢哋要睇整體,你會受控多啲。」

談起港產片,曾執導《大佬愛美麗》、《精武家庭》等的Stephen,坦言自小喜歡電影,「我細個時,係香港電影最興旺嘅時代,一大堆男性化電影,自己好熱愛。」原來他13歲已熱愛電影,他說︰「印象中,令我熱血沸騰嘅係《英雄本色》。Stephen笑指曾試過穿起爸爸的乾濕褸、太陽眼鏡,再手執水槍,模仿mark哥的造型。

訪問當日,他還帶了三本兒時做的電影筆記,打開看回自己的傑作時,Stephen一臉興奮,「87年我13歲,對電影好有興趣,自己睇完啲戲會做紀錄,好似影評咁畀分,做功課都冇咁好心機。」在筆記中,他看完港產片《英雄本色II》後,好有心機剪貼了該片的報紙廣告,並寫下給了90分,他笑謂︰「睇吓我幾執着,呢場動作場面貼錯咗,我要畫番個箭嘴指番。」Stephen是發哥(周潤發)、劉德華的影迷,他希望將來有機會,帶着這本兒時的movie report給他們簽名。

提到媽媽是60年代影星石燕,他坦言出世時,媽媽已息影,後來才知媽媽是演員,「我媽媽係洪大哥(洪金寶)媽媽嘅麻雀腳,記得我入行時,我媽媽約過洪大哥飲茶,我估我媽媽覺得既然你都入行,想搵人幫助吓。有次洪大哥叫我參與電影《霹靂火》,一場打鬥場面,我只係衝出嚟,洪大哥好認真仲畀咗500蚊我。」

今年4月,在金像獎頒獎禮上,他與當年《特警新人類》的好兄弟吳彥祖(Daniel)、謝霆鋒、李璨琛難得聚頭,勾起不少觀眾的集體回憶,望再拍《特》片,Stephen說︰「我都好期待,無諗到《特警》出嚟反應咁好,我哋都有熱誠同衝動做呢件事,而家試緊度期。」

難得的是,他們在圈中一齊成長,現在他們已屆40歲。Stephen坦言感到身體上有改變,他笑謂︰「過咗40歲真係好明顯,生命唔係永恆。好似朝早起身攞電話睇,發覺越嚟越拉得遠。有次我問Daniel,佢睇啲字要拉幾遠,原來佢拉得遠過我少少,咁我都開心啲。」Stephen更笑指平日都有做運動,「而家跑下要停下,夾雜住行,同埋要學習珍惜,花時間保養自己。」他的太太舒淇經常去打羽毛球,問他除了跑步,會否打羽毛球?他坦言︰「我唔識打呀!」豈不沒有陪太太打?他只笑不語。

娛聞樂陪你走遍全球追星,即Like「娛果」FB 專頁!
BannerBanner