【睇騷無界限】恭碩良開騷觀眾叫「罷工」:咁我哋聽日係咪唔使做

更新時間 (HKT): 2019.08.02 11:30

恭碩良(Jun)今晚於麥花臣場館舉行一連兩晚《Right Here Right Now Jun Kung Live 2019》,頭場到來捧場有田蕊妮、衛詩、周國賢、林德信、Eric Kwok、尹子維與女友徐冬冬、吳嘉熙與男友黃奕晨。

穿上牛仔褸、牛仔褲的Jun彈住結他獻唱《Hit and Run》為演唱會揭開序幕,他歡迎大家到來一年一度恭碩良演唱會,眼見台下全是俊男美女,他說:「希望大家喺兩個半小時裏面愛我多啲,容許我唱多啲舊歌,大家將出面啲嘢放喺出面,入嚟不論咩膚色、國籍,鍾意男定鍾意女,大家都係family。」當他唱到《Help is on the way》尾段便走到鼓位大騷鼓技,引得全場掌聲。

演唱會中途,Jun指因為前一日遇上8號風球,令所有綵排都塞在騷前大半日進行,他又自嘲跟颱風非常有缘,他說:「我係全香港遇到掛8、10號(開騷)最多嘅人,今次已經第3次,兩年前就10號,逢有風球都有我份。」他又指平時坐在鼓位打鼓時便得得戚戚,但走到台前主唱就似剝剩底褲一樣,心情緊張又坦盪盪。

當準備獻唱《喺你嗰度》時,Jun再次走到鼓位,換成他視而為師傅的鮑以正步出台前結他伴奏,大師現身令全場觀眾驚喜萬分。唱畢後,Jun指若果今世有位親生哥哥,這必定是身旁的鮑以正,他說:「當年我哋第一次見面係為B哥哥(鍾鎮濤)錄音,佢同我講如果想造歌、錄音,得閒可以聯絡佢,嗰吓有位大師級咁同我呢位o靚仔講,呢首《喺你嗰度》就喺佢度錄。」Jun還稱記得當年同媽咪講以音樂作為職業,差點被打,想不到由幫人打鼓到灌錄自己的歌,以他一位出生於香港,在澳門成長再返回香港定居的歌手,已經非常幸運滿意:「我覺得要相信自己入面嘅指南針,可以聽人意見,但都要相信自己,好似我揀,寧願行錯路都試吓去行,我今日總算做到自己想做的。」

到演唱會尾段,Jun指今個騷並非紅館的三小時騷,加上大家明天將要返工,也是差不多時間完結,場內即有人叫「罷工」,Jun被這兩字嚇一嚇,他說:「咁我哋聽日係咪唔使做,都講咗出面啲嘢放喺出面,唔返咪唔返,唔好講嗰兩個字咁難聽。」Jun繼續獻唱,觀眾也靜心欣賞,最後以一曲《月球人》結束頭場演唱會。

娛聞樂陪你走遍全球追星,即Like「娛果」FB 專頁!
BannerBanner