【親自回網民】游學修搞宣傳撞正罷工日 被網民質疑抽水

更新時間 (HKT): 2019.08.03 14:11
(IG圖片)

游學修和盧海鵬主演的ViuTV劇集《仇老爺爺》昨晚播完,而游學修昨日在社交網發帖表示,將於下周一(5日)在觀塘舉行簽名和派poster。不過下周一撞正民間發起的全港大罷工,有網民質疑他為何在觀塘搞宣傳,偏離集會地點,更有網民留言指責他,於罷工日搞宣傳,有抽水之嫌。

游學修昨晚在IG寫︰「【特備節目】我知道好多人仲想要Poster,但遲咗睇到個post,所以我決定再加印少少,下星期一出嚟現場簽名送俾大家,但由於只能辦工時間,不用上班的人優先,如果你已經留咗名/攞咗,一樣歡迎大家嚟影張相,少少心意,大家歡喜就好,而舉行地點在觀塘,並於上午11點至下午1點時段。」

有網民留言指責他,借罷工搞宣傳疑抽水,亦有網民撐他表示︰「不用上班的人優先,句潛台詞就係叫人罷工」、「其實有冇需要咁敏感呀!」之後再有網民指他︰「潛台詞點睇都係你哋罷工,佢就開工為自己做勢喎。」最後游學修自己親自回覆︰「咁我依(而)家答你地(哋),我支持三罷。如果因為竟然為咗張爛鬼poster,而趕唔切準時1點集會,我呼籲大家唔好嚟。如果大家心大心細,我俾多個理由你地(哋)星期一罷工。夠清晰未。」

娛聞樂陪你走遍全球追星,即Like「娛果」FB 專頁!
BannerBanner