【出道唔夠一年】ERROR開騷海報放MIRROR宣傳:得我哋個樣驚賣唔出

更新時間 (HKT): 2019.08.11 09:00

由ViuTV《全民造星》打造出來的騎呢組合「ERROR」,一直走搞笑無厘頭路線,4子在娛樂圈出道不足一年,竟敢孭重飛開棟篤笑,以人到中年為主題去發揮,三十未出頭已自稱中佬兼「窮X」,道出港青心聲上車難無樓住,遇上中年危機等貼地問題,還會爆娛樂圈潛規則。

組合成員梁業(肥仔)、保錡、何啟華(阿Dee)、郭嘉駿(193)現時身兼多職,為公司做綜藝節目主持、講波、拍劇分身不暇,日前接受訪問透露接獲公司指令,10月將踏上旺角麥花臣場館開騷,4人不約而同「吓」一聲,隊長肥仔對公司今次的冒險雖然覺得迫在眉睫,曾擔心過能否應付得來,但有感是「天跌落嚟餡餅」,是組合殺出重圍的好機會。

ERROR透露該棟篤笑已有初步構思,除了說話演戲,還有歌舞表達,是次主題「人到中年 口不擇言」,而他們都正在奔三,阿Dee說:「娛樂圈潛規則30歲藝人已經算老啦。」193補充解釋:「韓國娛樂圈好早出道,30幾歲搵夠退休,我哋只係啱啱出道,加上我哋有呢個意念真係感受到中年危機,擔心自己會唔會脫髮。」暗嘲現年29歲阿Dee髮線上移,而他在4人中自認最有中佬味,並說:「由細到大都俾人話我樣老,唔年輕,入咗娛樂圈係我人生演藝事業最忙嘅一段日子,對我嚟講係一個新挑戰,我都努力適應緊,嗰種疲倦係前輩話齋『上世做錯事,今世做電視』,毫無破綻。」保錡則說:「香港人先咁遲或仲未結婚,未有屋住,呢個文化香港先有,但在世界上我哋已經好大個。」

開騷例必談論時事,冷嘲熱諷社會,訴出港人心聲,阿Dee說:「全世界Talk騷都咁做,例如社會通脹、物價、樓價都會講,有冇樓住對我哋生活構成影響。」要緊貼時事,當然是近日遍地開花,阿Dee表示:「大家唔會失望,入場會睇到想睇嘅嘢。」他們另一環節開騷已鋪排,早前ERROR在一條宣傳片中,4人在的士上大肆發表言論被車cam偷拍,之後更引伸到公司要他們開記者會向公眾道歉,繼而鬧解約,的士車廂偷拍遇上車cam,大家一定聯想到「安心事件」,他們否認以此借鏡作賣點,純屬巧合。

他們又會大爆娛樂圈潛規則,肥仔坦言台上所說經歷半真半假,而一向敢言的193則說:「會講生存方法,例如識討好人先會多啲工作,我哋加入娛樂圈未夠一年,都知道好多你要點做先令你得到利益同更出名。」保錡在四人中最「ERROR」,隨時爆肚難以控制,他笑說:「會keep住本身係九唔搭八,性格改唔到。」大家都希望保錡可以發揮存在感令觀眾發笑,而193被肥仔譽為「講嘢最癲,亂入神化境界」,193無奈表示:「講乜啲人都覺我唔係認真,分析唔到我嘅真假,有時好認真,啲人又以為我講笑。」

組合出道不足一年,以新人計算,工作量尚可,但一講到收入就異口同聲稱「窮X」,保錡說:「有分唔同窮法,有超級地底泥窮、勒住褲頭袋窮、開始搵食窮,我係超級地底泥負資產窮,有日差啲想問舊老闆請唔請人,要打兩份工。」肥仔自嘲食到窮,平日跟電影《喜劇之王》一樣要搲飯盒。而4人在捱窮日子找到最折衷方法,193說:「我哋只要拍劇開工全日就掂,唔使用錢,有飯盒食,最好07開工,到晚上3餐唔使用錢,仲可以有的士錢。」一齊開更可以分甘同味。組合首次開騷掘金,他們竟稱有信心靠兄弟組合MIRROR爆場,並高調宣揚:「賣飛冇問題,我哋仲有嘉賓,令到爆騷係靠MIRROR,佢哋有嶄新表演,我哋亦會歌舞,經多番思量海報加咗MIRROR落去,驚得我哋4個樣賣唔出。」

娛聞樂陪你走遍全球追星,即Like「娛果」FB 專頁!
BannerBanner