【曾暗示尋死】舊愛April終於蒲頭 感激張致恒用「愛和耐性」陪伴走過抗抑鬱路

更新時間 (HKT): 2019.08.17 14:22

張致恒(Steven)宣佈結婚生仔原本是一件開心事,但卻因為太多情,一次過傷害幾個女仔,當中包括一直以為自己是「正印」的梁皓恩(April)。April曾暗示尋死,暱埋不願見人,在社交網留言:「點解忽然世界末日?#我怕過唔到今晚。」至上周,Steven公開向April道歉:「我都要喺度好真誠咁同April講一句:對不起!」

相隔逾半個月,April今日終於蒲頭,在IG留言:「Something to Share.衷心謝謝每個朋友的關心和愛,陪伴我過渡過段時間。以後的路還很長,願大家繼續陪我一起成長和學習。Where there is pain there is love.」

April更拍了一段約7分鐘的短片,開口就說道:「要拍呢條片真係好唔容易,因為我都知我收埋咗自己好一段時間。」她直言之前情緒「唔係咁理想」,所以沒有動力回覆短訊,但今天她想跟大家說:「我係ok嘅,冇事就冇可能架喇(苦笑),但係我會畀心機行,所以我都想用呢段片畀自己好似一個開始咁,專注當下。」

April曾在IG hashtag「被偷走的那五年」,但原來她與Steven只是拍拖兩年,自己不是第三者,她說:「我同張生拍拖係17年,以我所知同佢之前嘅女朋友係冇重疊到,所以都希望唔會因為我一路冇講而令大家受到傷害。」April還自爆未與Steven拍拖前,已經要食抗抑鬱藥,反而是Steven給予愛和耐性,令她逐漸康復,她說:「其實我嘅親戚朋友都見證到佢係幫咗我好多,因為嗰陣我已經食咗抗抑鬱藥一段時間,佢係好有耐性、好有愛咁陪伴咗我一段時間,令到我唔使食藥,咁嗰段時間都會針灸、其他方法等去幫我,但係身邊嗰個人陪伴係非常緊要,而嗰段時間,的而且確係喺佢嘅幫助之下我先好番,直到而家都冇再食返藥。」

這段經歷,令April相信她與Steven的關係已經去到一個好穩定的地步,所以同居後,亦從來沒有懷疑過對方。她說:「拍拖第二年,佢嘅工作好忙,佢話返大陸拍戲呀、拍TVB節目好唔得閒,我冇去懷疑,亦唔會去Check電話,所以我真係...原來係咁難去接受呢啲,全部都唔係我想像咁嘅情況。我知道張生結婚同有小朋友嘅消息係同大家一樣,因為我都係出post之後先知,我亦都搵唔到佢,嗰陣我係極大打擊嘅,同埋我一直都同佢同居,所以我冇諗過可以咁嚴重(苦笑)。」

最後April說:「報道上面畀我知道嘅真相更加多,我都唔知亦唔敢再睇所有嘅新聞。我只係想畀大家知道我到底發生咩事,呢十幾日我一直想搵方法去治療自己,但係其實我係搵唔到架,真係靠我啲朋友24小時陪住我,等我唔會做傻事啊,因為我都好弱,所以真係靠每一個人每一點一滴嘅幫助,令到我喺呢一刻仲可以同大家報平安,我都唔知之後嘅路會點。」

娛聞樂陪你走遍全球追星,即Like「娛果」FB 專頁!
BannerBanner