【建制派包圍港台】「小豪子」曾志豪寸爆示威者:用大陸套標準嚟計,梗係唔中立啦

更新時間 (HKT): 2019.08.24 18:53

建制派組織「香港政研會」今日發起包圍香港電台,抗議港台立場偏頗,示威者今日帶中國國旗到港台抗議,在港台門外貼上「垃圾電台」、「黑媒港台」等標語,又大叫「賣港賣國」口號。

主持港台節目《頭條新聞》爆紅的曾志豪,今日回覆《蘋果》時表示示威者抗議時自己不在港台,他說:「我覺得要好好同佢哋商榷一下,佢哋口中嘅偏頗,或者唔中立其實係乜嘢意思,我估而家對佢哋嚟講,有傳媒全面咁將呢個抗爭運動裏邊,無論示威者、政府又或者警察嘅一啲唔好嘅事,如果全面報道出嚟,而對佢哋有不利,或者有壓力,我諗對呢班人嚟講,都等於偏頗同埋唔公正,所以咁情況下好難有乜嘢討論,大家對公平同偏頗嘅定義都唔同,我個人係非常歡迎佢哋聽晒香港電台無論電台或者電視節目,真係好希望佢哋睇完之後好客觀咁話畀我哋聽,邊一句說話、邊一個嘅新聞報道、邊一個節目內容係佢哋認為偏頗同唔公正。我覺得咁樣先至有討論意義。」

示威者指有記者不中立,曾志豪表示:「咁要睇吓佢哋講緊香港嘅記者、一般喺新聞上監察政府嘅記者,定係佢講緊祖國內地政黨喉舌嘅黨媒,如果佢用大陸嗰套標準嚟計嘅話,梗係唔中立啦,又冇畀領導答一啲好完滿嘅答案,但如果佢哋用我哋一般新聞學,我哋認知嘅,或者公眾對於新聞記者嘅要求,我覺得唔好話香港電台嘅記者,好多唔同機構嘅記者,包括畀人詬病嘅無綫記者,其實盡咗好好嘅天職,因為佢哋真係將市民嘅心聲,問政府官員,所以其實去到最後,真係要問返呢班示威者,佢哋心目中嘅記者係有乜嘢功能。」

示威者揚言下次會有更大規模行動,問曾志豪有甚麼睇法?曾志豪說:「好似政府所講,歡迎對話㗎,不過希望大家和平理性,最緊要和理非,當好多唔同市民用好多好優雅嘅方法,拉人鏈、貼連儂牆,或者唔阻礙一啲機構活動情況之下做,我哋都希望佢哋都會咁做囉,咁佢哋唔咁做都得嘅,我哋會要求政府好似保護啲警察、警署咁拉啲水馬保護我哋囉,既然佢哋對於所有示威行為都係用呢個方法㗎嘛,一視同仁囉。」

曾志豪表示早年曾遇示威者到港台示威:「嗰次規模唔係好大,我仲有出去拍片添,嗰次係抗議一啲電台節目,嗰次交手經驗太有趣喇,因為佢哋自己都噏唔出節目名同主持人名,淨係背頌幾句口號,今日我唔喺現場,唔知佢哋有冇進步到。」

示威者之後拉隊到商台抗議,商台在facebook貼上示威者照片,表示:「環保唔係唔好嘅,小編都好支持環保嘅,但係下下拎住港台標語嚟敝台門口示威........一批參加『萬人包圍香港電台』嘅市民,去完港台示威,抗議佢哋立場偏頗之後,到商台門口抗議。」

娛聞樂陪你走遍全球追星,即Like「娛果」FB 專頁!
BannerBanner