【港姐之母出殯】趙雅芝黃錦燊到場致祭 莫可欣感謝Rosa當年鼓勵

更新時間 (HKT): 2019.09.12 12:00

「港姐之母」陳紫蓮(Rosa)今日於紅磡世界殯儀館出殯,治喪委員會成員曾醒明一早到場打點,李明慧、莫可欣、安德尊、趙雅芝及丈夫黃錦燊等以素服到場致祭。

早上十時許,莫可欣離開靈堂時受訪:「我上次見Rosa已經係年幾前,但都唔知佢有病,所以收到消息嗰刻好突然。」她隨即找向海嵐,對方表示Rosa家人指她不想大家擔心,因此未有公開病情。

莫可欣大讚Rosa為無綫及香港小姐貢獻了30多年,於1993年獲選香港小姐冠軍的莫可欣,在參選時承受很大壓力,幸得對方支持及鼓勵。莫可欣說:「雖然有時佢令我哋好緊張,好驚做錯嘢、講錯嘢,但係佢好錫我哋。我參選嗰陣唔係好舒服,佢叫我撐住,選完都好大壓力(被指最醜港姐),睇到啲新聞好唔開心,如果唔係有Rosa鼓勵,我會做咗好多不必要嘅決定。」

她坦言有幾乎崩潰的時刻,Rosa鼓勵她這是學習的過程:「佢叫我做好自己本份,而家我做人都係諗住呢樣野,硬淨啲、頂落去,所有嘢都會過去嘅。」

曾醒明與Rosa共事30多年,兩人同為香港小姐效力:「我哋開創咗港姐出外景同着三點式嘅先河,我哋喺工作上好密切,Rosa睇住我入行。佢係親力親為、擇善固執,守護住香港小姐呢個品牌,我會稱呼佢係香港小姐守護神。」他指Rosa與傳媒關係很好,對佳麗們一視同仁。

曾醒明又指年初收到Rosa來電,透露身體不適:「佢叫我一定要堅守呢個秘密,直到5月慧妍雅集嘅周年慈善ball,Rosa係第一次缺席,好多人問我點解佢唔去,我都唔可以講。」他表示Rosa離世前十多日,兩人再次聯絡,感覺對方的聲線不太精神,當時Rosa直言叫曾醒明不要到醫院探望,怕自己沒精神招呼:「我同佢喺圈內圈外都係最佳拍檔。」

早上約11時許完成辭靈儀式後,Rosa遺體送到鑽石山火葬場進行火化。

娛聞樂陪你走遍全球追星,即Like「娛果」FB 專頁!
BannerBanner