【前世情人】黃澤鋒阿女似足「米芝蓮」 可愛到暈唔捨得返工

更新時間 (HKT): 2019.09.18 11:40

邵仲衡(大佬孝)、黃澤鋒夫婦、趙慧珊(Aka)、麥子樂、吳肇軒、麥長青等昨晚在尖沙嘴出席電影《第一滴血:終極血戰》首映禮,大佬孝表示一直有追看《第一滴血》系列電影,直言是集體回憶。有否試過扮Rambo?他笑說:「紮住個頭就頂唔順喇,但我哋嗰個年代都係流住Rambo嘅血液,史泰龍做戲係好好睇,係好好嘅學習對象。」他透露上半年較為有點忙,除了在東南亞宣傳電視節目外,下周更為ViuTV劇集《me too》做宣傳,他說:「而家個個都放緩,我都要搵個烏托邦麻醉下自己,因為日日見到咁唔開心嘅嘢,自己要調節下。」

Aka指自己第一次看史泰龍的電影,但知道對方的故事,由失敗到成功,練到自己好大隻,「我都欣賞男仔大隻,因為佢會好有規律去練習,咁就會少咗好多游思妄想。」雖然她過往的男友都是文弱書生型,但為了結婚繁殖下一代,都想揀個健碩男士,她說:「細我一年嘅妹妹年底都結婚,父母就冇催我,如果妹妹生埋仔都頂到兩、三年。」

此外,黃澤鋒與太太陳麗麗撇低只有兩個月大嘅女兒熙恩拍拖看首映,他們表示由表妹暫時代為照顧,鋒嫂說:「好唔捨得呀,同埋佢每朝都有新花款,食完奶就會望住你微笑,好冧囉!」問到澤鋒是否不想返工,他表示:「我有時間就會返屋企睇下佢,佢就會扮萌咁望住你,好似有千言萬語咁,哎呀,我點返工呀,你咁樣。」鋒嫂笑說:「真係前世情人。」澤鋒透露早前才正式替女兒沖涼,才發現女兒好似「米芝蓮」一樣肥,「呢個過程係最好玩,但就辛苦咗太太,因為未戒夜奶,兩個鐘餵一次。」鋒嫂指女兒現時食母乳和奶粉,笑指肚餓得滯,連「父乳」都照吃。見鋒嫂身型比之前瘦了一點,她笑說:「之前係阿B吸收,所以我卸貨之後,身型都唔係變得太緊要,只係水腫,而家因為傷口問題,都未做得伸展運動。」

娛聞樂陪你走遍全球追星,即Like「娛果」FB 專頁!
BannerBanner