【夢想成真】田蕊妮動盪時刻開個唱強忍眼淚 阿澤做大會攝影

更新時間 (HKT): 2019.09.20 21:48

田蕊妮「KRISTAL TIN NEW STAR LIVE CONCERT」今晚在旺角麥花臣場館舉行,阿田的圈中好友如洪永城、鄭世豪、吳業坤、譚俊彥夫婦、鮑起靜、莊端兒、阮兆祥和陳嘉寶等人現身支持外,老公杜汶澤擔任大會攝影!演唱會在晚上8時30分開始,開場前有觀眾叫:「香港人加油!光復香港、時代革命、五大訴求、缺一不可!」

阿田以一身黑白裙出場,她說:「多謝大家喺咁動盪嘅時候都嚟支持我,不過今日唔係我嘅演唱會,係我最尊敬嘅爸爸,佢準備咗70年,就快攞生果金!」接着戴了黑超的田爸爸,以一身黑Tee牛仔褲出場,他先唱了一首《You Cheating Heart》,阿田大讚爸爸聲音充滿經歷,肚腩充滿脂肪,然後一齊合唱《月亮代表我的心》,唱到中段時候,兩父女手拖手行台邊,田爸爸說:「我幾多年冇咁拖住個女行街?應該有廿幾年。」兩人再度合唱《I Will Always Love You》,阿田感謝爸爸多年來養育栽培,田爸爸說:「我喺15歲推你上台,估唔到而家70歲畀你推番上台,喺我啱啱過生日一星期!」阿田再說:「今晚所有掌聲都回饋畀爸爸!」

阿田在台上一度有點眼濕濕,台下隨即有觀眾大叫:「阿田唔好喊!」不過阿田說:「我唔會喊,點都會忍住,大家知唔知我等咗呢個演唱會等咗好耐,細個嗰陣我係獨居兒童,阿爸阿媽都出去做嘢,我有一個大我7年嘅哥哥,佢經常要發展自己嘅愛情生活,所以成日將我獨留喺屋企!」她續說:「由嗰陣開始,我成日喺屋企發白日夢,幻想有一個自己嘅演唱會,有人會嗌我個名,我就係喺呢個環境下成長,嗰陣我都受爸爸影響,聽咗好多歌,我幾歲就識得唱鄧麗君嘅歌,甚至因為曳畀阿媽打而練聲,而家大家每日4點都會有記者會睇到,其實以前每日四點鐘就係我嘅個人演唱會,係喺祖堯邨開個人演唱會。」大螢幕播出當年阿田參加歌唱比賽的片段,阿田重唱當年的參賽歌《一首獨唱的歌》。

娛聞樂陪你走遍全球追星,即Like「娛果」FB 專頁!
BannerBanner