【感覺太夢幻】新婚人妻王敏奕回味婚禮情境:太肉麻嘅嘢費事講

更新時間 (HKT): 2019.09.21 00:30

王敏奕(Venus)本月6日與拍拖6年的曾國祥於北海道新雪谷的小森林共諧連理,婚禮夢幻又浪漫,當天有一眾親友包括老爺曾志偉、曾寶兒、陳瀅、余安安與鄭希怡等見證這個浪漫的婚禮。剛榮升曾太的Venus婚後首次現身,昨天她到新蒲崗為ViuTV新劇《假設性無罪》宣傳,Venus回憶婚禮的情況時依然sweet爆,她說:「啱啱返嚟幾日,其實每一日都做緊嘢,未有好特別覺得新婚後有咩唔同嘅感覺,未有時間度蜜月,可能我哋喺第二個地方結婚,所以感覺都似⋯⋯好似發生咗好多嘢,係時候返嚟收拾心情做吓嘢先。」Venus又謂結婚後幾日已回味婚禮的情境,她說:「太夢幻嘞!結婚前啲人都同我講要enjoy每一個moment,因為好快過,我發現原來係真!會覺得過咗一個好開心嘅party,好多人同你玩,心入面又會覺得呢個moment係唔會再發生,唔會話好開心下年再搞過嘛,頓然有一種失落,唉,得一次㗎,好回味!個個都好開心,令我哋都好開心。」

他們選擇在北海道的森林舉行婚禮,她說:「北海道係我哋拍拖第一次去旅行嘅地方,亦係每一年都會去滑雪嘅地方,近年試吓夏天去,發覺好靚,我哋喺城市生活,覺得北海道咁郊區嘅地方,有另一種好舒服開心嘅感覺,可以放低所有煩惱,希望大家錫我哋嘅人,帶畀佢哋一個開心嘅party。」

二人的婚戒是在手指上紋了「愛的紋身」,曾國祥紋了9條線、而Venus則有6條,代表他們的結婚日期,她說:「呢個梗係曾導演嘅諗法啦,佢真係一個好專業嘅導演,成個婚禮90%都係佢負責,多謝佢畀個咁靚嘅婚禮我,呢啲嘢全部都係佢諗。對我嚟講越簡單越好,我提議不如紋一條線就算,佢話唔得,一定要有意義嘅。」

曾國祥曾揚言是個「不婚主義者」,如今又突然閃婚,問Venus是否逼婚呢?她笑說:「我唔知呀!太肉麻嘅嘢費事講,結婚對每一對情侶嚟講都係講timing,佢覺得係時候啩,結婚係周邊嘅朋友講先嘅,去到個男仔真係覺得想喎,嗰陣時我又覺得畀多啲時間我做嘢先,而家大家都覺得可以進入呢個階段。」她又指求婚經過簡單,沒有甚麼好分享,而他倆亦未考慮在港補擺喜酒,希望親友在日本享受他們的婚禮安排,他們也不太着重儀式,問到老公有甚麼愛的宣言?Venus說:「因為我哋喺外地搞,結婚誓言冇話要跟住點講嘅,我要求大家自己寫誓言,之前大家都冇睇過對方嘅,點知讀出嚟嘅時候,發覺好相似,我哋(將來)應該會幾開心嘅!佢有話錫晒我,當我係best friend⋯⋯」

問到志偉對這位新新抱有何評價?老爺恨抱孫嗎?Venus說:「我哋從來相處得好開心,都冇乜話訓話嗰啲,我亦冇生小朋壓力嘅,之前Derek講過話唔會結婚,大家叫佢唔好再講生唔生仔嘞,冇人會再信佢,我諗完成手頭上嘅嘢先,呢樣嘢仲有時間安排。」

娛聞樂陪你走遍全球追星,即Like「娛果」FB 專頁!
BannerBanner