【等Moka批准】郭富城父女齊跳洗腦兒歌 珍藏片段隨時公開

更新時間 (HKT): 2019.09.22 16:30

為超洗腦英文兒歌《Baby Shark》拍新MV的郭富城,今日在尖沙嘴出席跳舞活動,與小朋友大跳Aaron Kwok Style「Baby Shark Dance」,他表示今次獲邀跳舞,心想應該要有爸爸版,還指大女(Chantelle)看過後,即攬住他錫。

受訪時,城城指大女很喜歡《Baby Shark》:「佢一扭計就要聽,自己開iPod撳入去,我同佢一齊睇,原來係神曲。」他坦言有教大女跳,直指大女絕對有跳舞天份,他說:「佢而家都有上音樂堂,唔知係咪爸爸做呢行有關,我覺得係有囉。」今次拍這個MV,城城坦言有私心,可受惠於自己的女兒,故此更加願意做這個工作:「呢首歌令我發覺喺小朋友世界入面都有神曲,唔只《對你愛不完》、《唱這歌》係神曲,我好開心可以融入小朋友嘅世界。」

城城透露私下拍了一條兩父女齊跳《Baby Shark》的片段,問到會否公開這條片段?他笑說:「我做呢行咁多年,要保護番自己嘅小朋友,有時同傳媒朋友講,唔好兜口兜面影我個囡囡,但係我而家有少少改變,等我同太太商量吓。因為小朋友都返N班(學前班),我好開心第一日我同太太送佢返學,睇佢行入去課室嘅時候,我係感動,我就改變咗我嘅思想,我覺得佢要去學習點樣合群,點樣群體生活。」問到大女返學時有沒有喊?城城說:「又冇喎,因為有太太帶住,只可以一個家長帶住,太太同我講囡囡都OK,可以適應,我都覺得佢要見多啲外面嘅世界,所以將來公唔公開呢條片,就遲一步啦,我都樂意去分享,不過唔係而家。講個秘密畀你聽,其實佢今日有嚟到,但係我唔知佢而家喺邊,你哋搵唔到佢,我特登叫佢嚟睇爸爸工作。」

提到他與太太經常放閃,除了shopping外,更甜蜜遊維園,城城笑說:「我11月拍電影,而家做緊準備功夫,基本上拍電影就冇晒自己嘅時間,所以作為丈夫、爸爸,未拍電影嘅時候,多啲陪太太同小朋友,出外面玩,見識呢個世界。其實行公園係一件好浪漫嘅事,就算太太懷孕嘅時候,我哋都係經常行,因為公園嘅環境同空氣都比較好啲。」此外,城城指11月接拍的電影,是飾演一名高科技的偵探。

採訪:黃曉妍

娛聞樂陪你走遍全球追星,即Like「娛果」FB 專頁!
BannerBanner