【狗仔出更】最索星二代Hilary陪富三代男友睇波鞋 平坐小巴返歸

更新時間 (HKT): 2019.09.30 06:00

被稱為「最索星二代」的上山詩鈉22歲女兒Hilary,去年在美國完成大學課程返港不久,即被爆有新男友,新歡是愛國商人施子清孫兒、富三代施仲樂(Eric)。

熱戀中的Hilary,不時都孖着Eric四圍去,包括早前陪男友入馬場看馬匹試閘。而《蘋果》日前又在銅鑼灣遇上2人甜蜜拍拖。身材高大健碩的Eric,當日穿了一件灰色背心型T恤及黑色短波褲,似足剛剛打完波,穿白色小背心的Hilary,則以黑色外套及黑色legging來配襯男友裝束。

當日約黃昏6時,一對小情侶手拖手在時代廣場閒逛,沿途有傾有講,之後Eric走進一間運動用品店睇波鞋,Hilary就做跟得女友,陪男友一齊睇。不過,她全程未有給予太多意見,主要都是Eric自己揀,但最後Eric未選中心頭好,2人便離開店舖繼續行,之後再去一間影音店試耳筒。

Hilary當日雖然化了淡妝,但仍難掩倦容,等Eric揀耳筒期間,一度發呆站在一旁,直至Eric為她戴上耳筒試聽,她才稍為有反應並展露笑容,2人在影音店「玩」了幾分鐘便離開,接着行去附近往寶馬山方向的小巴站排隊等小巴,然後一齊上小巴離開。

娛聞樂陪你走遍全球追星,即Like「娛果」FB 專頁!
BannerBanner