【60年後再合作】馮寶寶重遇Daddy謝賢 又攬又錫坐大髀

更新時間 (HKT): 2019.10.04 18:49

林家棟監製的黑色喜劇《殺出個黃昏》今天在西環拍攝,主角謝賢(四哥)與馮寶寶、林雪等齊齊在一幢舊樓內拍攝,寶寶姐穿上5吋高跟鞋配草帽華麗現身,她開心展示手機中的舊照片,她說:「我同四哥合作嘅時候係手抱咁大,當時4歲,喺《連理枝》入面演男仔,嘉玲姐係我媽媽,四哥係我爸爸,所以到而家我都叫佢四哥Daddy,已經有一甲子冇見過面,今次我哋係做殺手,不過已經退休。」提到60年後再合作,寶寶姐笑言跟四哥一見面便要教他玩手機,又指他很忙,很難約,她說:「我一見到佢就攬住錫啖,坐上佢大髀,佢仲大嗌話就嚟斷骨。約佢佢又成日都唔得閒,所以唔係霆鋒唔陪佢㗎。」四哥則謂自己無事忙,並透露女兒婷婷將返港,又謂未見過孫女。

提到寶寶姐6月在泰國遇車禍,鼻骨移位,寶寶姐說:「冇事嘞!之前Z咗(鼻樑被撞到變形),入面鑲咗膠片,推番正佢,5日後已經拎返膠片出嚟,冇嘢嘞,而家化妝師會推吓,但有一晚推完想嘔。」寶寶姐又指劇組對她很好,拍攝很舒服,她說:「劇組對成熟嘅演員好照顧,雖然每日需要拍14小時,我仲要早兩個鐘敷面,不過拍2日就休息1日,可以瞓吓覺做facial,如果有咁好待遇嘅戲,我唔怕多啲返嚟。」寶寶姐指劇組專誠安排司機服侍她,而今次她更將整個廚房搬來香港開工,並親自烹調「友德汁」蔬菜汁慰勞大家,也為家揀慶祝生日。

至於問到四哥之前探望患病的甄珍,寶寶姐笑問:「係咪復合呀?」四哥即大耍太極說:「邊個甄珍?台灣都有幾個喎,真係唔記得,等我打電話畀佢。」

另外,家棟透露今次只是監製身份,沒有參與演出,但每天都會監場,以便照顧謝賢和寶寶姐,他表示兩位演員由他親自邀請,早前更是親到馬來西亞邀請寶寶姐:「我搵完佢冇耐,寶寶姐就撞咗車,好彩冇事,四哥就年頭已經搵佢,好難得有呢個組合,四哥到而家都好小生,但今次我唔准四哥chok,要畀觀眾睇到一個不一樣嘅四哥,唔chok都可以型。」家棟透露四哥係退休殺手,因擅長用刀,退休後轉做刀削麵師傅,故事就此引申,而當中更有不少動作戲,家棟笑指四哥剛開工時因冇得chok而悶悶不樂,但一拍打戲即精神奕奕,他說:「仲有其中一場喊戲,我仲擔心四哥喊唔喊到,點知佢即刻就嚟,我仲問佢係咪有心事?大家都覺得好勁,我睇到好興奮。寶寶姐就要一句對白有3種情緒,我好榮幸可以同佢哋合作。」

採訪:羅慧敏、攝影:林賓尼

娛聞樂陪你走遍全球追星,即Like「娛果」FB 專頁!
BannerBanner