【好兄弟】郭政鴻請定假飲陳山聰喜酒 送超市禮劵做賀禮

更新時間 (HKT): 2019.10.10 22:20
(攝影:林賓尼)

陳蕊蕊的美人魚學校今晚在九龍灣舉辦「亞洲美人魚小姐大賽」,邀請郭政鴻、喬寶寶、范振鋒及太太李思欣等到場支持。活動曾三度改期,蕊蕊表示很開心終於成功舉辦:「因為都比較亂,原本諗住暑假前搞晒,但係之前太多問題,今日都OK嘅。」她表示未有刻意改rundown遷就交通,又謂感恩很多朋友仍到場支持。

擔任評判的蕊蕊,提到選美人魚小姐的準則,她說:「技術當然好重要,最緊要睇埋表達能力,同埋為海洋保育嘅心。因為勝出嗰位美人魚,都會去唔同地方,宣揚海洋保育。」

同場的郭政鴻亦是評判之一,他指選美人魚小姐外貌與身材同樣重要:「動作要優美,膚色都好緊要,最好古銅色,熱帶啲、海洋啲嘅感覺。」

至於他的好兄弟陳山聰下月1日結婚,問郭政鴻是否已請假準備飲喜酒?他說:「呢個一定啦,佢今次就不設兄弟團嘅,簡單同佢啲親友食餐飯,都係同佢一齊成長、提攜過佢嘅人,仲有親戚為主。佢太多朋友請唔晒,之後會逐一食飯。」

郭政鴻笑指會送超市禮劵做賀禮,問他是否方便山聰將來到超市買奶粉、尿片?郭政鴻說:「唔使啦,好多人會sponsor佢。」至於可有傳授育兒心得?他笑指山聰「知死」:「嗰時我成日講,佢又唔聽,不過每個階段唔同嘅。而家啲朋友都結咗婚、生咗仔,以前成班人玩,而家越來越少人,佢都好無癮,加上佢係我兩個女嘅契爺,見得多,呢個階段都想要。有小朋友,個人正能量多啲,條路又清楚啲,希望佢加油。」

今日山聰的婚照曝光,相中未婚妻Apple似是刻意遮肚,郭政鴻表示不知情:「真係唔知,呢啲咁私人嘅嘢,我冇咁八卦,如果係我一定做契爺。」記者笑指他要及早準備金碗筷上契,他笑說:「等佢生性啲生個出嚟先,到時睇下我點處理佢。」

娛聞樂陪你走遍全球追星,即Like「娛果」FB 專頁!
BannerBanner