【永遠的偶像】李泳豪對住阿媽做戲有啲怯:佢氣場好勁

更新時間 (HKT): 2019.10.11 16:20

施明、李泳豪與楊玉梅等今晚於九龍灣出席《極闘6飄移都市》首映禮,有份參演的施明與泳豪首次母子檔演出,泳豪說:「覺得好有意義,由細到大第一次一齊拍戲,一齊參加首映,係值得紀念嘅事。我哋只係有一場對手戲,但係我都好緊張,因為對住媽咪有啲怯,佢本身唔惡嘅,不過佢氣場好勁。」施明則說:「唔關氣場嘅事,我以前拍戲對住偶像,好似四哥呢啲,都會NG好多次,會唔識做戲咁,心理上會好緊張,我係阿媽嚟㗎嘛,佢都係咁。」永豪笑指媽咪是他的偶像,他說:「媽咪唔鬧人嘅,不過佢啤一啤我就會驚,大家喺片場都會溝通,大家當對方係演員咁。」

至於對囝囝演技的評價,施明說:「我不嬲都覺得佢好,細個直情係天才童星,好容易入戲,而家就要努力嘞,唔係因為佢演技唔好,因為我想佢多啲機會做戲。」二人在戲中也有不少內心戲,泳豪嘆有一定難度,他說:「我係一個關注傷殘同埋悲情屋企嘅一個神父,我覺得都高難度嘅,媽咪就係演一個好慘嘅case,係要好多內心戲,好難做,但媽咪好強,我都輸畀佢。」

至於楊玉梅戲中的弟弟患有唐氏綜合症,她拍攝時長期保持低落的情緒,她說:「場場都要喊㗎,搞到情緒都好低落,拍完之後要自己坐埋一邊紓緩返情緒。」提到以戲中她素顏上陣,她說:「唔化妝都冇所謂,我係演員唔係明星,叫我扮醜角都得㗎,係啲人以為我選美出身好貪靚。」

提到楊玉梅有份參與大台劇集《牛下女高音》,沒有宣傳會否感到可惜?她說:「我覺得唔緊要,好睇嘅唔使宣傳都多人睇,我哋都好期待。」劇中她跟龔慈恩是閨密,穿衣的顏色跟埋造型也一樣,拍得開心,問到有否慰問失婚的龔慈恩?楊玉梅說:「婚姻佢自己會處理,做朋友嘅大家會明白,唔需要問,咁大個人,佢拍戲嘅時候都好開心、好積極,大家仲分享扮靚心得,我覺得生活唔需要有另一半,人要獨立嘅,啱就最好,唔啱亦都唔需要有。」

採訪:羅慧敏

娛聞樂陪你走遍全球追星,即Like「娛果」FB 專頁!
BannerBanner