【正式啟航】陶枳樽不甘被困舒適圈 勇敢單飛挑戰自己

更新時間 (HKT): 2019.10.15 00:30

前女子跳唱組合HunterZ成員,有翻版張栢芝稱號的陶枳樽(Crz)最近推出單曲《Wake Up My Soul》,日前Crz在灣仔接受《蘋果》訪問,談談今次作個人發展的準備情況,顧名思義新歌正正是Crz自己的寫照,她形容以前像是一直沉睡,到現在才正式蘇醒,她說:「我覺得以前自己一直留喺安全圈,到而家獨立發展先真正算踏出勇敢嘅一步去挑戰自己,所以新歌就用上呢個主題。」

以舞蹈員身份入行到現在單飛,Crz坦言以前很怕改變,即使曾以組合形式短暫出道:「今次歌詞嘅內容都係我嘅想法,填詞人好好咁將我想表達嘅放晒入去。」不過她補充說今次歌曲主旨其實屬一首情歌:「其實內容同樣套到落兩個人相處度,當你拍拖而發現嗰個人同你相處唔到,可能性格唔係太適合而又令你好傷心,咁就應該勇敢踏出一步去做出改變。」是否過往在情路上有太多失敗經驗?她否認說:「又唔係嘅,點都係一個成長嘅經驗。」

Crz又自言是一個「騰雞」的人,對於今次要自己單飛發展,內心承受着很大壓力,她說:「我其實好冇自信,因為以前做女團好多時候訪問都係大班人一齊做,自己當時就好似一個附和嘅狀態幫手搭吓嘴咁,但而家就要自己面對,其實仲習慣緊。」

雖然感受到壓力,但另一方面Crz稱有壓力才可以逼自己成長,又表示自己正一步步將夢想實現,她說:「由做舞蹈員開始就希望自己有朝一日從台後企出台前,之前又因為聲帶有瘜肉要做手術,康復後而家嘅聲線自己亦接受咗,知道呢樣係自己嘅特點。」新歌和MV早前推出後,Crz稱幸好聽到外間的反應普遍正面,她更特別感激公司的安排:「其實新歌同MV做好咗後一路冇話幾時出,點知公司特登揀喺我生日正日發佈新歌,當係送畀我嘅生日禮物,真係好感動。」

娛聞樂陪你走遍全球追星,即Like「娛果」FB 專頁!
BannerBanner