【最緊要馬仔健康】城城拖Moka撐愛駒 「舞士精神」跑第二

更新時間 (HKT): 2019.10.16 22:42
(攝影:卓寶花)

【新增內容】

郭富城當上馬主後不時拖太太方媛(Moka)現身馬場,城城的愛駒「舞士精神」曾經當旺拉頭馬,今晚第4次出戰,首次在跑馬地出賽跑夜馬,兩公婆十指緊扣現身支持愛駒。

城城拖着太太受訪,他認為愛駒狀態不錯,並說:「練馬師話試吓,交畀佢安排,不過檔位就排第10檔,支持吓囉。」提到愛駒每次出賽被視為大熱,城城說:「我都好擔心馬迷盲目投注,啲馬要試,唔跑唔知道,我哋都希望馬仔好,有好成績,不負馬迷期望。」並坦言希望「舞士精神」再次拉頭馬錦上添花。

今次入場會否落重注?城城說:「唔會啦,其實我上次都冇買,唔好以為馬主一定會落注,養馬係一種樂趣,當然想馬跑得好,馬主有獎金,所以唔一定要再落注。」

做馬主開資花費大,雖然馬匹有出賽及拉頭馬,但未夠養馬,阿城說:「一直都想隻馬升班,代表有進步,最緊要馬仔健康出賽已好開心。」訪問結束後有馬迷遞上一幅有城城和騎師Q版漫畫給城城簽名,心情超靚的城城即停步,有求必應。

「舞士精神」在第7場出賽,城城帶Moka到沙圈,見Moka與城城經理人小美站在沙圈欄杆密密斟,「舞士精神」在沙圈時顯得比較緊張,由騎師出力安撫,首次跑快活谷草地賽的「舞士精神」結果跑第二。

採訪:攝影:卓寶花

娛聞樂陪你走遍全球追星,即Like「娛果」FB 專頁!
BannerBanner