【否認專揀富二代】李施嬅直認同鄧健泓唔夾:拍拖5年受咗好多唔開心

更新時間 (HKT): 2019.10.19 16:15

李施嬅入行16年,近日因為《金宵大廈》而人氣急升,雖然事業發展順利,但感情方面卻未有着落,自從09年與鄧健泓結束5年情後,至今都未出現Mr.Right。李施嬅日前接受商台節目訪問,提到當年與鄧健泓的一段情,她說:「我可以話以前係好鍾意談戀愛,而家就冇乜所謂,可能以前係自己一個人做嘢,有愛情出現會有安全感。其實佢唔係我鍾意嘅Type,但係好有藝術天分、好細心嘅一個人。嗰陣爹哋生意失敗,有人關心自己,係特別易打動嘅。」她續說:「其實我同佢唔係好夾,好耐之前都應該要分開,唔應該係一對,我哋喺嗰5年係受咗好多唔開心,亦都好負能量。只不過因為我對感情好執着,好難放棄,就算好多朋友都話冇結果,但都拖拖拉拉4年,因為大家又一齊住,好難分開,直至我去咗加拿大讀書,終於有個break可以行出嗰步。」兩人分手後,依然再見亦是朋友,若有需要大家都會互相幫忙。

在訪問上李施嬅亦否認自己「專揀富二代男友」,她笑說:「其實識我嘅人都知道我唔係,我冇乜特別條件,搵到一個啱嘅而又頂得我順嘅人已經好好,但係要有一個男人接受我係好難,我又成日周圍飛,事業心又重,成日都要拼搏。以前諗過想喺30歲之前結婚,但係而家過咗就冇諗,爹哋媽咪又冇畀壓力我,順其自然喇,結唔結婚都唔係好重要嘅嘢,最緊要係搵到啱嘅人。」不知胡說八道會的好友們有否給她介紹好男人?她說:「我最想係子羚同定欣可以快啲搵到另一半,我覺得定欣係好難,因為佢好強同好叻,越叻同越強嘅女人係好難搵到另一半,而且佢仲比我挑剔啲,所以係比較難,但係我真係好想佢搵到另一半,亦都好想子羚搵到一個值得佢愛嘅人。」

之後又談到當年由李詩韻改名為李施嬅,她有點感觸地說:「李施嬅其實係嫲嫲改嘅,爹哋媽咪鍾意李詩韻,嫲嫲係我最愛嘅人,不過佢已經離開咗我,所以呢個名對我好有意思。嗰陣大家覺得我好白癡,點解入咗行10年先改名,公司都有管理層好反對,不過我都堅持,呢個係紀念嫲嫲嘅一樣嘢,我相信會為我帶嚟好多嘅嘢,但係亦因為呢個名,令我得罪咗某啲人,覺得我唔應該改,但係偏偏走去改,我冇理呀,我就係有呢個性格,可能唔夠圓滑,間接影響咗事業。」

娛聞樂陪你走遍全球追星,即Like「娛果」FB 專頁!
BannerBanner