【精神不俗】林子博帶太太睇首映放鬆 獲華仔介紹私家醫生

更新時間 (HKT): 2019.10.27 16:38

伍詠薇、莊端兒、林子博與太太及子女等今日到銅鑼灣出席動畫電影《愛登士家庭》首映禮。伍詠薇與老公練海棠結伴到場,首次為動畫電影配音的她,感謝哥哥伍經衡幫忙教她戲中的法文對白,哥哥今日亦有到場支持。

伍詠薇笑言自己很成熟,所以少看卡通片:「不過呢套戲係黑色幽默,如果有呢啲戲我都推薦自己,咁啱美國嗰邊就搵我為呢個動畫嘅女主角配音。」她透露事前要錄音寄到美國,直言自己幾叻女:「我比預期時間少咗3個鐘完成,錄晒之後,美國嗰邊聽完,我都只係補一句對白。我都有做好多功課㗎,啲長對白,我對住隻貓講200次。」

提到老公練海棠昨日生日,兩人與家人食飯平淡慶祝,伍詠薇:「平淡是褔呀嘛,衷心嘅,而家最大嘅禮物就係同屋企人食飯。我自己父母走咗,佢父母都差唔多90幾歲,安排餐溫馨飯局最好,唔係多少錢嘅問題,禮物都係浮雲。」

林子博帶同太太及子女到場欣賞電影,剛剛完成第二次化療的太太董燕君精神不俗,林子博說:「我捉老婆出嚟,唔好成日匿喺屋企,覺得自己唔舒服。」太太透露還有一次化療便完成,兩人明天會與太太見教授參考醫學意見。林子博指劉德華介紹了私家醫生:「政府醫院就冇咩可以做,私家醫生就建議我哋用標靶藥,香港冇得賣,要喺內地買,所以聽日同教授見下面,睇下啱唔啱太太。」

他坦言預算每月要幾萬元醫藥費,幸好經濟壓力未有太大增加:「差唔多,自己間中都有做MC工作,又幫高皓正拍緊啲發放正能量嘅片。」問他是否不會亂發脾氣?林子博即笑住向太太說:「你畀我去遊吓車河啦,感覺好爽。」太太隨即表示擔心他駕駛電單車有危險。

莊端兒以動畫中的孖辮囡囡密實造型現身,談到她於電影《墮落花》中與關智斌有激情戲。她笑指激情戲部分,穿得很密實:「不過係第一次意識咁大膽,令人好有幻想。反而最性感係拍槍戰,仲要跑來跑去。」

採訪:盧妹

娛聞樂陪你走遍全球追星,即Like「娛果」FB 專頁!
BannerBanner