【不獲減租】筱靖等唔到李嘉誠救亡 銅鑼灣食肆生意差執笠

更新時間 (HKT): 2019.11.02 19:42

亞視永恆!今晚新一屆亞姐舉行港區決賽,同時亦舉行亞姐仁美清叙重組10周年晚宴,好多前亞姐都有出席睇小師妹比賽。

前亞姐筱靖及張珮汶(前名張嘉瑩)分別都谷胸現身,筱靖說收到大會邀請與佳麗跳舞,但她就拒絕:「自己記性唔好,同埋時間問題,得兩個鐘綵排,所以放棄咗呢個機會。」筱靖在銅鑼灣及大圍都有西餐廳,不過最近生意受影響,銅鑼灣食肆已結業:「生意下跌已經執咗笠,其實都捱咗幾個月。埋單都蝕咗7位數,合約本身係到下年,不過業主都肯放我走,呢個時勢要守望相助一下。試過最低得200蚊生意一日,曾經試過一個禮拜有4日開唔到舖。」她又說如果以後要開舖,不會再考慮香港區:「同啲業主傾過都絕不動搖唔減租。」

已做媽媽的張珮汶最近就忙住湊女,囡囡現時8個半月大,張珮汶形容時間過得好快:「囡囡而家企得起身,需要我嘅時間就更多,成日要跟住佢,要好多體力勞動,唔使點郁都會瘦。」張珮汶讚囡囡雖然活躍但算易湊:「要帶囡囡返playgroup,而家做全職媽媽,唔知忙乜但時間好快過去。」她又透露與老公有共識再生:「兩個起三個止,有多個兄弟姊妹。」問到是否立志追仔?她說:「隨緣啦,至少多個伴。」今晚港區決賽,張珮汶已見過佳麗,問到會不會心癢復出?她說:「喺後台見到佢哋,都諗番起自己當時,戥佢哋緊要。想出番嚟做嘢,但都係以阿女為重,想要咗個BB先。」

採訪:卓寶花、攝影:沈建程

娛聞樂陪你走遍全球追星,即Like「娛果」FB 專頁!
BannerBanner