【世紀辯論】黃秋生預測杜汶澤穩勝︰係唔講得粗口會縛手縛腳

更新時間 (HKT): 2019.11.05 14:15

今日下午4點半,港台將在節目《視點31》找來杜汶澤和陳百祥論政,萬眾期待,有網民更惡搞賠率,阿澤意料之內成贏家大熱。對於世紀辯論,黃秋生今日接受《蘋果》電話訪問以理性分析結果,他說︰「斯斯文文港台可以點啫,兩個係咪理性辯論先,好似兩個都唔係呢一派,會縛手縛腳,阿澤又唔講得粗口......嗰邊(阿叻)資訊又有限,接觸面唔廣,唔夠阿澤咁廣,但係阿澤唔講得粗口。不過阿澤轉速快,娛樂性豐富,都想睇下佢講咩嘅。」

至於雙方辯論較看好哪一方?秋生斬釘截鐵表示:「梗係買阿澤贏,我覺得阿叻唔會拍枱走人,咁肉酸,阿澤更加唔會啦。爆粗唔會啦,阿澤唔會爆粗。冇嘢想問阿叻啦,佢次次畀親啲股票、馬都係山埃嚟,山埃王仲有乜想問佢。真係冇乜嘢想問佢,佢資訊好有限,所以都係好主觀。我發覺阿叻好可以代表以前香港人,覺得掟爛嘢唔啱,好傳統老派嘅香港人。而家呢個咁動盪時代,唔可以再用呢啲觀點分析事情,唔係睇表面對與錯,係單獨一件事係黑白分明。」

黃秋生話好多人覺得「先出手唔啱」,他說︰「打個比喻細路仔打咗大人隻腳一下,大人就插盲佢對眼,但都係細路仔唔啱,因為佢出手先。而家係用咁嘅推論,似是而非,你都要睇下件事係咪對等。魔鬼在細節,好多時候睇事情時冇睇細節。」他解釋目前仍有很多人,以一種傳統非黑即白去分析事情,不少老一輩都依照固定方式去做事,他舉例︰「好似話紅燈,停綠燈過馬路,但有一日有癲狗咬籮柚,但係都係紅燈停綠燈就過馬路。因為佢固定咗,學習返嚟,我就要遵守呢個規則唔識變通,點解會咁?因為容易生存,好似機械咁,唔需要分析特別情況,呢啲係好老派香港以前啲人,你想一個幾廿歲嘅人點啫,你問我有乜嘢想問佢(阿叻),問佢都多餘啦!」

娛聞樂陪你走遍全球追星,即Like「娛果」FB 專頁!
BannerBanner