【世紀辯論】阿澤指白色恐怖為中國文化 阿叻無視藝人被炒齋講馬蹄露

更新時間 (HKT): 2019.11.05 18:51
(資料圖片/港台facebook截圖)

杜汶澤今日決戰撐警陳百祥,在《港台視點31》facebook對決,兩人連場唇槍舌劍互唱反調,阿叻盲撐大陸冇封殺藝人,只見到馬蹄露被暴徒私了。

主持問到有演藝人懷疑發表支持反修例言論,失去大陸工作機會,阿叻說:「嗰啲我睇唔到,我睇到演藝人得一個,出去唔同意見就俾人扑穿個頭,仲要係女人,嗰個就係馬蹄露。」阿澤拉回正題問主持:「你意思係咪得罪大陸冇得返去做嘢?小弟就係其中一個例子,2014年雨傘之後被封殺。」阿叻扮儍問:「有封殺咩?」阿澤忍唔住噴笑,阿叻死撐:「有封殺嘅咩?佢以前喺國內做嘢,我冇喺國內做嘢,變咗封殺我,佢喺大陸搵錢喎。」

阿澤再講一次是2014年之後,阿叻追問:「你喺裏面做嘢嗰時,有冇人警告你?逮捕你?有冇人明面話封殺你?白紙黑字話封殺你?」阿澤承認有睇過份紙,阿叻賴皮:「你話有就有,呢啲我唔知,我唔參與,封唔封殺唔關我事,我唔喺國內搵食。」阿澤說:「我覺得你好犀害,你係真心,冇喺大陸搵食都咁支持。」

主持問到有藝人做護旗手,阿澤說:「我諗護旗有好多因素,有啲真心,相信有工作需要,你要喺大陸受歡迎,有需要咁做,中國人就係咁樣,非黑即白,你唔支持佢,代表反對佢。」阿叻:「而家香港就係咁,嗰班暴徒唔支持佢,中立都唔得,就要被私了,但我睇唔到國內係咁。」

阿澤即反擊:「私了係咬耳仔嗰啲?」阿叻死撐:「唔係,係你哋打啲阿伯,打完之後跌喺地仲要電槍電,寧願判14年都唔怕嗰啲。」阿澤即寸他:「係喎,你好似喺元朗俾人打咗鑊。」阿叻:「我冇喺元朗俾打鑊,係一位尊貴議員帶一班人入去挑釁,嗰啲係私自打鬥。」阿澤大笑:「嗰個好似你!認錯,sorry!」

再講回護旗手,阿叻說:「我從來冇做過護旗手,自己國家,保護自己國旗係天公地道嘅事,點會做咗護旗手就有嘢撈,你有咁市場價值咪有嘢撈,冇市場價值唔請你,好似我咁。」阿澤暗寸:「叻哥呢句講得最啱,有麝自然香,做呢啲乞錢咪冇料到。」阿叻:「我唔覺得乞錢,有啲人發自真心,成龍咪做護旗手,佢仲使撈咩,我要乞錢啦,我冇錢。」

至於有藝人不獲續約,是否跟娛樂圈白色恐怖有關?阿澤:「呢個冇辦法,國家文化嚟,佢唔鍾意你唔支持佢,或者講咗啲嘢佢唔滿意,當然市場喺佢度,佢唔歡迎你去賣唱賣藝,無可厚非,所以做藝人要自己調節,如果佢好想踏足呢個市場,我覺得應該唔好講咁多嘢。」阿叻:「我唔係咁睇,我係亂咁講嘢,乜都講,我認為人係獨立思維,做咗事要負責後果,等於我講咗撐警就撐警,我認為警察係唯一維持香港治安,保護市民生命財產嘅紀律部隊,所以做咗磨心。」

娛聞樂陪你走遍全球追星,即Like「娛果」FB 專頁!
BannerBanner