【年度盛事】Gin Lee唔慣冇得去頒獎禮 但尊重新城決定

更新時間 (HKT): 2019.11.08 15:47
(攝影:盧妹)

李幸倪(Gin Lee)今日到商台宣傳第二版專輯《浮世繪》,新碟加入4首新歌:「今次邀請咗英國DJ Jax Jones同一位意大利殿堂級歌手Eros Ramazzotti合作,Jax就幫我寫歌,Eros就同我合唱,每首歌都有廣東話同國語版。」

問到為何會邀請兩位外國藝人合作?Gin Lee謂首版專輯已與亞洲地區不同藝人合作,這次更衝出亞洲:「雖然佢哋都係環球嘅藝人,但係當中都有好多難度。呢件事上年已經籌備緊,始終大家工作嘅節奏好唔同,佢哋每樣嘢都好嚴謹,但係又有時差,啲嘢來來回回都要等好耐。」

Gin Lee坦言都有心急的時間,透露MV其實早已完成,但一直未收到對方回覆確認:「每個字點出,要咩顏色,佢哋都要睇。因為Jax Jones唔出鏡,但係佢有個代表佢嘅公仔頭,佢哋專程由英國寄嚟,但係個公仔頭只得一個,真係好驚整爛。」她認為雖然大家節奏不同,但亦會嚮往外國藝人work-life balance的生活,可以吸收更多靈感造歌。

至於新城今年亦取消頒獎禮,Gin Lee認為頒獎禮是年度盛事,沒得去會不習慣:「不過我都明白,我都會安排其他工作。」會否認為樂壇衰退?她說:「唔可以咁講,大會嘅決定都係因為而家呢個情況,我會尊重佢哋嘅決定。」

採訪、攝影:盧妹

娛聞樂陪你走遍全球追星,即Like「娛果」FB 專頁!
BannerBanner