【不作鹹魚!】黃妍追歌手夢被家人叫放棄 釗峰幸得隊友陪着面對

更新時間 (HKT): 2019.11.15 00:30

歌手梁釗峰和黃妍本月即將為舞台劇《無法成長的我們》演出,故事由商台DJ阿檸和導演馬志豪聯合創作,透過故事中代表20、25和30歲的角色去講述如何追逐夢想和過程中的種種經歷,日前兩位主角釗峰跟黃妍在新蒲崗的排練室中接受《蘋果》訪問,談談劇本及角色如何影響着他們。

黃妍和釗峰在當中分別扮演25及30歲的角色,而20歲的角色則由另一演員王柏霖飾演,釗峰表示:「知道阿檸用咗好多時間創作故事,的確題材好貼地寫實, 即係追夢嘅過程同追求嘅目標,唔係咩驚天動地嘅大事,反而咁樣會令到件事更加寫實。」黃妍更表示細讀劇本時,被當中對白感動到流淚:「因為講追逐夢想,自己就會諗起父母曾經對我講過類似嘅說話。」

現實中黃妍透露最初就是希望追逐歌手夢,未有獲家人太大支持,她說:「父母出發點係想我好,但表達方式唔同,佢哋想你行一條佢哋認為好嘅路,會講『點解唔搵份正正經經嘅工?追夢有咩用?』但自己就會覺得佢哋唔明白我嘅夢想,呢個就係矛盾點。」釗峰就話自己亦有類似經歷,他說:「幸好嘅係屋企人好支持我嘅決定,而且我當年加入C AllStar後,好多嘢都有另外三位兄弟陪着我一齊面對。」

除講述夢想追尋外,故事中亦有描述情侶間的相處,釗峰笑說:「我唔知阿檸點解會寫得出呢啲情節,可能佢經歷過好多,兩個人相處就會牽涉到幾時結婚啦?住屋問題啦?呢啲都係大家香港人會經歷到嘅事。」又舉例劇中角色:「劇中我同黃妍係情侶,好寫實地講到其實係互相愛大家,但由於要搵食缺乏溝通,搞到關係變淡,所以我哋喺劇入面都有一場鬧交戲。」旁邊的黃妍笑言:「經過今次排劇令自己嗌交功能大大提升,我以前嗌親交都輸。」

為了今次劇目,黃妍特地製作主題曲《刮骨》,她表示歌曲為劇本度身訂做﹕「每次談及成長,總會有一啲深到入骨嘅傷口,想移除需要好似刮骨療傷咁,但必須要記得你自己最深層嘅本性,要好好保留初心,我覺得好配合呢套劇嘅主題。」

既然講到成長,兩位在成長過程中可有作過任何後悔的事情?釗峰憶述:「記得細個媽咪叫我學琴,但自己想學電結他,因當時覺得彈琴唔夠有型,不過媽咪唔畀,話我太細個連結他都揸唔穩,最後兩樣冇得學,大個咗入行先發現其實係好大損失。」而黃妍則認為在大學階段,除讀書外並無參加任何課外活動是一大損失。

娛聞樂陪你走遍全球追星,即Like「娛果」FB 專頁!
BannerBanner