【一度昏迷幾日】韓馬利重提腦膜炎仍有餘悸:隻腳叉咗落鬼門關

更新時間 (HKT): 2019.11.21 15:06
(攝影:沈健程)

韓馬利(Mary姐)8月患上腦膜炎,要閉關休息治病,幸得丈夫杜燕歌悉心照顧,走出危難關頭,經一段調理後Mary姐已回復狀態,今日Mary姐精神奕奕地和蘇志威出席舞蹈學校的活動。

Mary重提患病時仍有餘悸,並說:「而家好好多,醫生曾經一度話我一隻腳叉咗落鬼門關再拉番我上嚟。」憶述病發經過時,Mary姐說:「最初發咗燒兩日,以為小事,之後老公話唔得要睇醫生,睇完即刻話要入院,我話唔使啩,之後就斷咗片,不省人事,昏迷咗個幾星期,朋友話我好番係好好彩,有人喺醫院一年手腳都用唔到,亦有3個月都未醒,咁大年紀腦膜炎好危險,唔好以為兩三日唔退燒冇咩。」

幸好Mary姐一直有老公杜燕歌在旁陪伴,她說:「嚇死佢,結婚30年未見過佢咁驚,好緊張好細心。」Mary姐指幸好日常有做運動習慣,不然身體抵抗力更差,她指:「吊藥三星期,個人散晒,又出冷汗又冇力,後來仲有抑鬱要睇醫生,現時食緊血清素,醫生話要食半年,驚我唔食會番發,現時個人反應好慢,見到啲嘢又或想嗌人個名講唔到,最少要半年先可以回復,要中西醫調理。」

Mary姐病發時曾經激瘦,她說:「跌咗7公斤,而家肥番5公斤,實質冇咗兩公斤,瞓到食到已經好好,病時瞓唔到食唔到,好無奈好慘好辛苦,朋友叫我開心啲,但情緒低落自己控制唔到,食嘢都吞唔落。」病癒後Mary姐深深感歎:「經過今次病完之後,靜下來嘅生命會享受慢活,以前比較繁忙。起身食到嘢唔係必然,仲可以食嘢唞到氣已好感恩,日後會關心多啲長期病患者狀況。」

蘇老闆雖然身為舞蹈學校老闆之一,但暫時沒有親自開班教學,因為正在舉辦草蜢巡迴演唱會中,學校推出新課程,蘇老闆說:「係一個世界認可課程,含金量好高,有專業認可之餘,課程對小朋友推動運動音樂好有幫助,亦獲得政府認可,可以申請資助。」而Mary姐則笑謂自己冇資格開班,但若果蘇老闆開單一定迫爆。

嘉賓之一的譚嘉荃,對原定9月初在九展改為今月22日在麥花臣的個唱,因社會局勢再延至明年5月舉行,表示無奈的她,希望明年5月局勢會安全點,亦感謝投資方願意付足三次場租,贊助商亦沒有退出。

採訪:卓寶花、攝影:沈健程

娛聞樂陪你走遍全球追星,即Like「娛果」FB 專頁!
BannerBanner