【演《返校》Miss】 蔡思韵在台生活6年被誤會是台妹 終回歸拍港片

更新時間 (HKT): 2019.11.29 06:00

蔡思韵(Cecilia),一個既陌生又似曾相識的名字。今年25歲的Cecilia,被稱「文青女神」、「氣質女孩」,去年她首次拍ViuTV劇集《短暫的婚姻》,飾演與陳奕迅有一段曖昧關係的少婦。最近她參演的台灣話題性電影《返校》,戲中飾演Miss殷翠涵,令人留下深刻印象,尤其她一口流利的國語。究竟她是港女,還是台妹?由她親自解答︰「我唔係台灣人,我係香港人,我最鍾意食香港嘅魚蛋粉。」

這位土生土長的港女Cecilia,中學畢業後,便去了台灣國立台北藝術大學修讀戲劇系,難怪被誤會是台妹,她說︰「因為我讀戲劇系,需要用國語嚟演戲,一直講一直講,身邊嘅同學、朋友,甚至生活環境,都係講國語。」前前後後她在台灣生活了6年,近年才回流香港,拍首部港產片《幻愛》。

談到被稱「文青女神」,Cecilia有點羞澀︰「其實我唔覺得自己好文青,可能我個人比較慢,講嘢又慢,畀人有種懶洋洋嘅感覺,因為步伐較慢,畀人感覺有氣質。但其實我係一個好傻、好癲嘅人,我唔鍾意有框架,畀咗呢個名我,好似對我有個既定嘅印象,會局限咗我,我寧願百變,先可以試到唔同嘅角色。」她形容自己內心像一個小男孩,既硬淨又有衝勁,永遠有着不服輸的男仔性格。

在剛過去的台灣金馬獎頒獎禮中,《返校》一片獲得5獎,成績不俗,其台灣票房更突破2.5億新台幣(約港幣6,400萬),該片將乘勢於下月5日在香港上映。談到拍《返校》,Cecilia表示已是兩年前的事,「我無咩恐怖場口,不過啲恐怖位都係喺一間荒廢嘅學校拍,所以喺現場真係有啲恐怖嘅感覺。嗰度有啲課室,放咗啲鏡同美容椅,仲有假人頭,我覺得真係好恐怖。」

她在《返校》中演Miss,在劇集《短暫的婚姻》中演少婦,角色都是比她真實年齡大,對她而言並不困難,她說︰「年齡嘅差距,唔係最大問題。我讀緊戲劇系時,試過演一個40、50歲嘅大媽角色,我覺得唔係太大問題,反而係一啲類型嘅角色,其性格同感覺同我有距離,反而會更難演。」最近她拍了首部港產片《幻愛》,戲中她演一名心理輔導員,卻與一名精神分裂康復者發展一段畸戀,而對手正是劉俊謙。

而早前她有幸參與香港話劇團,一部長達7.5小時的舞台劇《如夢之夢》,當中她演一個年輕版顧香蘭的角色,而中年版則是蘇玉華演繹,說起這次經歷Cecilia說︰「呢一個係當年經典劇本,我竟然有份做,勁興奮。我係當中資歷最淺,自己好多擔心,又驚自己做得唔好,好緊張。」她坦言戲中人物有點像自己,她說︰「諗番自己自身,離開台灣決定返香港發展,好像劇中嘅顧香蘭,離開後步向未知,面對一個新嘗試、新轉變。」

與媽媽相依的Cecilia,當初她想到台灣讀書,媽媽一直不支持,她指自己喊了足足一個暑假,才說服了媽媽。由於爸爸早逝,她跟媽媽關係又愛又恨,她說︰「我好愛佢,但自己係年輕人一定有自己嘅想法,媽媽比較舊嘅諗法,最重要係,就算點都好都要坦坦白白,開心見誠講,我哋係好愛對方。」至於談到已離世的爸爸,她回憶年幼時的點滴︰「Daddy喺我10歲嗰年走嘅,我印象中嘅爸爸,係個文筆好好,寫字好靚,佢會幫我睇作文。媽媽話爸爸會寫詩嚟追媽咪,係個好有文學氣質嘅人。」Cecilia曾擔心自己會遺忘爸爸,但長大後已沒有這念頭,她說︰「因為佢嘅血脈就喺我身體入面,所以我永遠都會承傳佢嘅嘢,唔會變亦唔會忘記。」

娛聞樂陪你走遍全球追星,即Like「娛果」FB 專頁!
BannerBanner