【叱咤5強對決】謝安琪自認有背景 林二汶預先寫感言

更新時間 (HKT): 2019.11.30 22:29
(IG圖片)

「叱咤樂壇流行榜頒獎典禮2019」昨日公佈了「我喜愛的男歌手、女歌手及組合 」最後5強,謝安琪上年成為大贏家的掃3.5獎,首次殺入女歌手5強的林二汶,今日在IG貼出5強走勢圖,笑言自己是「最正面女歌手」,因其他歌手都是影「三七面」,謝安琪隨即留言:「實至名歸,最正面嘅歌手當之無愧,就咁睇相嘅話,我算唔算係『有背景嘅人士』。」

二汶並寫下感性留言:「對上一次入選我最喜愛項目5強,係2009年,當時,係at17最後一次入選組合5強。10年後,2019年,我再次喺最喜愛項目5強出現,今次,我入選女歌手5強。路途遙遠,在路上邊走邊看,我學懂咩叫得到,咩叫失去。到達每個check point停一停,卻係回首嘅好地方。」

「我19歲入行,你睇住我大,我睇住你大,我哋陪你笑唱歌畀你聽,你陪我喊陪我作最後一鞠躬。今年37歲,我覺得我最確切擁有嘅,係呢啲見得到同見唔到嘅陪伴。你哋有幾多人未出嚟做嘢,到而家已經做咗老闆?有幾多人未拍拖,到而家個仔同女都已經讀書?有冇人移民咗之後返咗嚟?差不多兩個十年,我哋陪咗大家差不多兩個十年。我未必有機會喺台上面講,而呢啲說話,亦都唔需要等到上台先講,我希望你哋可以舒舒服服讀呢段字。因為,我真係好感謝你哋。我覺得,呢個就已經係獎項。」

娛聞樂陪你走遍全球追星,即Like「娛果」FB 專頁!
BannerBanner