【經歷新世代】黃宇詩轉型從商屢遇困難:做人同做生意都要靈活變通

更新時間 (HKT): 2019.12.05 06:00

現年43歲、已故才子黃霑的女兒黃宇詩,98年從加拿大回流返港加入無綫,雖然曾經參與不少主持工作和劇集的演出,但發展不似預期,結果在2014年她決定淡出娛樂圈,建立自己的內衣自家品牌,甚少在幕前出現。事隔多年,黃宇詩在好友陳圖安的邀請下,為香港開電視主持節目《滋味人生》,在節目中訪問十位名廚,了解他們怎樣在入廚中悟道人生。在現實生活中,黃宇詩亦坦言當初決定轉行學做生意,對人生有另一種新體會。

黃宇詩2014年在元創方(PMQ)開設自家品牌內衣店,2017年與曾志偉合資在銅鑼灣再開分店,雖然當日經歷過雨傘運動和反送中運動,對生意或多或少有一定的影響,不過她說:「今次係一個挑戰,好似會繼續落去,我自己有一個好傻嘅諗法,香港人始終都有少少運氣,始終都會轉好。」她還說:「過去嗰幾個月唔差,但係今個月(11月)係有少少影響,好彩租金唔算太貴,撐到吓,繼續努力喇,諗唔到咁多,今日唔知聽日事,過得一日得一日。當下就係最好決定,冇得返轉頭諗點解,收早啲咪返早啲囉,做人同做生意都要靈活變通啲,冇得諗咁多,我相信唔止我一個,其實好多人都遇到同樣嘅問題,大家都未遇過呢個時代,要睇吓大家嘅功夫。」

正如當日黃宇詩放下藝人的身份,走到另一邊從頭開始,對她而言亦是新挑戰。回望過去,她笑說:「可能以前真係太得閒,工作量唔係太多,嗰陣覺得自己年紀都唔細,由外形到演技都對自己冇信心,咪入咗組做主持,加上又有人搵做MC job,所以咪揀選穩定嘅搵食路,慢慢開始睇唔到將來,覺得冇乜前景,做幾耐都係一樣,突然行到個位,希望有自己世界,咪選擇咗呢條創業路。呢個係人生另外一個階段,我都幾開心揀咗呢條路,係好唔同,以前做幕前真係好幸福,幸福得好緊要,嗰陣兼顧嘅嘢唔多,唸好啲稿,搞好個樣就已經好夠,但係而家發揮自己嘅空間係大咗,自由度係大咗,變咗好似慢慢搵到自己,不過諗嘢係諗多咗,白頭髮都多咗好多,但係我真係好開心做咗呢個決定,可能做嘅嘢好辛苦,壓力同面對嘅嘢都多咗,但係對人生嘅體會,係有另一個層次。」還笑說:「而家諗番都覺得自己(以前)唔識變通,冇咁開朗,屈住自己,做咗啲錯嘅決定,不過如果我真係咁醒,就唔係咁。」

黃宇詩貴為才子黃霑的女兒,媽媽華娃更是著名歌手,對星二代黃宇詩而言,難免會感到壓力,她說:「兩睇啦,我老竇係一個多方面同好多範疇嘅人,廣告、音樂同電影乜都識,世界觀係好大,我又唔係音樂人,本身冇乜天分,亦冇諗過向音樂嗰邊發展,因父之名好似個個都睇住你,其實只不過係自己畀自己壓力,反而多咗機會曝光,某程度係一個光環。」

至於感情方面,黃宇詩在11年被爆與測量公司董事兼人夫Peter拍拖,雖然其後她澄清是Peter離婚之後才正式開始發展,不過仍然被懷疑是第三者。談到目前的感情狀況,她說:「好開心喇,都係嗰個,最難捱已經過咗,我哋交往、相處好舒服,兩個人諗法同感情都一致,佢令我有好多正面嘅諗法,我可能有好多嘢係唔識諗,喺我鑽牛角尖嘅時候,佢會抽番我出嚟。但係喺我而家嘅心態係暫時唔會結婚,暫時冇呢個需要,不過唔知將來會點,尤其呢個年代變化得咁大,會影響咗一啲諗法,唔知會唔會因為發生咗一啲嘢,而影響一啲決定。其實朋友與朋友之間都係一樣,見得就見,珍惜呢刻有嘅嘢,做人好簡單。」

撰文:唐琛悠

娛聞樂陪你走遍全球追星,即Like「娛果」FB 專頁!
BannerBanner