【拍劇開拓新戲路】梁漢文周旋4女之間 樂演壞男人角色

更新時間 (HKT): 2019.12.06 15:20
(攝影:卓寶花)

梁漢文(Edmond)昨晚到觀塘,為歐陽德勛主持的音樂節目擔任嘉賓,兩人認識廿載有多,節目更是歐陽德勛超過第80集錄影,所以Edmond一收電話立刻答應出席。Edmond稱有網友獲悉他上節目,剪輯了一段多年前的片段,他說:「係91年我做第一個節目主持,訪問當時做DJ嘅歐陽德勛,成廿幾年前。」

Edmond完成ViuTV劇集《假設性無罪》及電影工作後,正處於休息狀態,他坦言:「今年少咗喺音樂上發揮,對上出新歌已經2017年,而家都有寫歌畀歌手,近日已經計畫好明年動向,多番啲音樂發展。」問到是拍劇拍戲好辛苦?他即否認:「唔係,都不知幾enjoy啦,舐晒嘴呀,拍戲仲見番好多舊朋友,加上人又長大咗,識得點揣摩角色,幾好玩,反而拍劇對我嚟講幾有新鮮感。《假》劇講明唔開續集,但ViuTv話會開另一故仔,今次幾好吖,開拓咗我做壞男人路線,周旋4條女之間又唔討人厭,都有難度,我幾滿意角色。」

張衞健(Dicky)近日和拍劇班底聚會,Edmond指Dicky近日都在港,早前更和他打波娛樂,而聖誕節和除夕,Edmond要到大陸工作,留待至一月才和太太及好友旅行。

採訪、攝影:卓寶花

娛聞樂陪你走遍全球追星,即Like「娛果」FB 專頁!
BannerBanner