【錢非萬能】城城兩個夠晒數 自言非舊式思想:話我追仔係荒謬

更新時間 (HKT): 2019.12.08 15:25

郭富城(Aaron)今日去到沙田馬場,為「浪琴表香港國際賽事」擔任形象大使。對於有傳Aaron以百萬利誘老婆生仔,Aaron笑言不能用錢來衡量,更沒追仔打算。

Aaron的愛駒「舞士精神」日前再次勝出頭馬,Aaron高興表示慶幸愛駒不負眾望,他說:「係叻仔,多謝香港馬迷支持,不負眾望,贏係開心,不過喜歡賽馬活動嘅朋友唔好孤注一擲,我自己都冇投注, 因為自己已經係馬主,所以贏咗都有彩金。」

郭富城表示,其馬匹出賽很多朋友會問意見,Aaron說:「其實隻馬之前兩次都抽到唔好嘅檔位,對隻馬呢講係考驗,一次又一次突破,好似我拍戲同開演唱會,遇到嘅困難咁。所以鍾意隻馬似我比賽有鬥心,佢一步一步,由新馬去到四班、三班,攞過三次冠軍三次第二,最緊要係,健健康康,隻腳唔好受傷,因為之前養嗰兩隻都退役,贏唔贏一件事,健康好緊要。」

對於會否帶兩個女去睇馬,Aaron說:「我驚佢驚,驚佢太細個,所以大少少先。」對於是否追生仔,Aaron說:「我唔知邊度嚟呢個消息,係佢哋自己創作,創作多過問我意見,有兩個女已經好幸福好開心,暫時冇呢個計劃,唔好畀啲報道妖言惑眾。」至於是否出一百萬利誘老婆生仔,Aaron說:「完全係創作,唔係用錢嚟衡量,唔係買賣,聽到得啖笑,始終係一生承諾,建立幸福家庭用錢買好奇怪,有兩個已經花好多時間,太太又要搞時裝工作,所以暫時冇呢個意願,話我追仔係荒謬,冇呢個意願,女有女好,好sweet,我唔係舊式思想。」日前見到Aaron買花氹老婆,Aaron說:「係即興,屋企擺花有生氣,女仔都鍾意花,睇到都開心,自己經常都咁做,但係你影唔到咁解啫。」

此外,陸詩韻今日去到馬場捧朋友場,她說:「自己有學過騎馬,但係冇養馬,朋友係第8場,同黃婉曼嗰隻同場都支持。自己唔識賭馬,近年入馬場投注都係跑第二,但係自己有抽獎運,之前抽到三獎抽到隻錶。」陸詩韻表示,近排工作淡靜,往年年尾31號一定有工作,但係今年都冇,可能會去韓國旅行。

採訪:張明、攝影:陳俊強

娛聞樂陪你走遍全球追星,即Like「娛果」FB 專頁!
BannerBanner