【韓流】孫藝珍甜蹺玄彬谷劇

更新時間 (HKT): 2019.12.09 13:12
《愛的迫降》周六首播

韓國型男玄彬及女星孫藝珍二度合作的tvN新劇《愛的迫降》,將於周六(14日)首播,劇組陸續公開新劇照及海報谷劇,玄彬、孫藝珍今日連同徐智慧及金正鉉亮相發佈會造勢。

儘管現時韓國天氣寒冷,不過孫藝珍仍然愛靚唔愛命,穿上淡黃色吊帶連身裙,搭配粉紅色冷外套,谷胸微露事業線兼晒腿示人,即時搶晒鏡,令身穿紅色長褸包到冚現身的徐智慧被比下去。孫藝珍更心情靚靚在現場大派心心,又蹺着緋聞男友玄彬合照,十分甜蜜及合襯。

提到玄彬、孫藝珍繼韓片《智命談判》後合作,玄彬表示:「因為《智命談判》嘅拍攝方式,其實我哋兩人冇乜直接面對面嘅對手戲,今次接觸多咗,喺佢(孫藝珍)身上學到好多嘢。」孫藝珍亦坦言:「好少有機會會喺短時間內再跟同一演員合作,所以覺得同玄彬都好有緣,相比起《智命談判》,今次係甜甜蜜蜜嘅戲份,展現出另一面,希望大家會期待。」談到兩人之前傳緋聞,孫藝珍、玄彬即時大笑,強調沒有因為緋聞而變得尷尬。

娛聞樂陪你走遍全球追星,即Like「娛果」FB 專頁!
BannerBanner