【免費開放】「梅艷芳國際紀念館」出現北角 梅啟明只望大家不忘梅姐

更新時間 (HKT): 2019.12.13 06:00

梅艷芳離世近16年,但梅迷對她的思念依舊如昔。今日有網友驚見「梅艷芳國際紀念館」突然出現於北角城市花園,《蘋果》獨家直擊梅啟明晚上現身紀念館,他說:「我都係想畀啲歌迷有個聚腳點。」

晚上約7時,梅啟明拉著兩個箱獨自現身紀念館,記者幾經要求,他率先讓記者進入仍在製作中的紀念館。館内貼滿阿梅的照片,梅媽的華強中西音樂學院、錦霞歌舞團、阿梅兒時演賣花女的劇照、阿梅廣播道家中的照片、阿梅的人型紙板等等,林林總總堆滿數百呎「館」內。

梅啟明表示紀念館將免費開放,讓梅迷參觀:「冇咩特別裝修,主要畀人知有個會址喺度,等外地嚟嘅歌迷,有個地方聚吓。我諗住整個卡拉OK,大家唱下歌,同埋擺個電視放阿梅嘅野。」他表示未有為紀念館宣傳,暫時仍屬初步階段:「而家隱蔽式、簡化啲,主要自己未整好,香港又咁嘅環境。」

梅啟明向記者展示阿梅擔當女主角的電視劇《香江花月夜》海報,他說:「對阿梅嘅嘢,我都會keep起,就算係一張紙,我都會keep。」店内擺放4、5個大鐵箱,還有逾十個紙皮箱,梅啟明表示全部都屬於阿梅的。

梅啟明主動提到多年來被外界質疑揮霍無道,對於負評連連,他受訪時為自己平反:「其實我好想講,你哋成日將我講嗰啲嘢倒轉晒,我講嘅每一句都係真。」他透露成立紀念館,只希望大家不要忘記阿梅:「呢啲(演藝事業)係佢嘅天份,好多人話咩迫佢(阿梅)出嚟唱歌,講得咁難聽,其實邊有得迫?佢喺屋企真係要風得風,個個都錫佢。」

梅啟明透露紀念館是梅媽的意思,笑謂自己只是行動組:「我個招牌都係放咗兩日,你哋咁快就知道?原本想12月尾開,不過而家仲有好多嘢搞,仲試緊啲電。主要都係擺阿梅嘅相,成名前同埋成名初期嘅野,啲值錢嘢,偷得嘅都被人偷晒。」他更親自為紀念館佈置,鋪地毯、釗牆身,每張相、每件擺設,都是梅啟明逐少逐少搬來:「得閒就做啲,一日一日咁做,我盡量啦。」

梅啟明坦言現時最多就是阿梅的相,只因阿梅大部份遺物已被拍賣,他說:「拍賣嘢畀佢(梅媽)做生活費,嗰一個幾毫,使唔使咁誇張呀?其實係清洗、謀得就謀,我哋有咩苦未捱過?我哋唔係為錢,外界成日話爭身家,屋企人有咩好爭?有就使得好啲囉,冇又冇乜所謂。」

問到阿梅的徒弟有否參與紀念館事宜?梅啟明有點無奈地說:「你話呢?人唔喺度,茶一定就涼架啦。如果係攞個心出嚟為阿梅,有個慰問我哋都好開心,連慰問都冇呀。」至於梅媽身體狀況?他表示梅媽很好,雖然已90多歲,但仍每星期打一次麻雀,閒時到酒樓飲茶。

梅啟明於館內放有自製的postcard及紀念特刊,他說:「派就真係唔得,自己印咗啲賣畀大家。」旁邊放有紅色收款箱,收益將作紀念館經費。

娛聞樂陪你走遍全球追星,即Like「娛果」FB 專頁!
BannerBanner