【樂壇不景有因】陳柏宇唔強求樂迷睇頒獎禮 時事新聞更值得關注

更新時間 (HKT): 2019.12.14 16:00

港台、新城、商台相繼宣佈取消樂壇頒獎禮,各自搵方法頒獎給歌手,今日新城就率先頒發5個獎項。

新城今日於馬鞍山舉行《新人大熱唱2019》,即場頒發5個獎項,陳柏宇、許廷鏗及林奕匡以前輩身份到場為李靖筠、林家謙、ERROR、鄺星宇、林晴恩及林慧倩等新人打氣。陳柏宇受訪時,被問到有否留意今年新人?他坦言越來越少留意樂壇新人:「因為生咗女,新人就係個女,以前唱完歌都會留低傾吓偈,而家趕住返去湊女,而且自己都唔好意思,成個『老嘢』咁行埋去。」至於有何勉勵說話與他們分享?陳柏宇鬼馬地說:「而家新人條路好崎嶇咩?其實崎嶇係一種心態,唔係一條路嚟。我入行嗰陣預咗,同期嘅人會有比你風光嘅時候,唔好比較。我當年嘅目標係3年內供養到自己。」對於香港樂壇不景氣,未能如當年爆出廣受大眾歡迎的歌曲或受矚目的歌手,陳柏宇認為音樂是社會的一部份,既然現時的時事新聞比娛樂新聞更值得大家關注,不需要要求外界必須關注樂壇:「最緊要做好自己本份。」

許廷鏗以師兄身份現身,他聞言即笑說:「我都係新人咋,其實我嘅分享係,每年都當自己係新人,因為做新人最幸福。坦白講,我唔覺得今年嘅新人係新人,好似林家謙、吳林峰都有幫我寫過歌,我係有私心,今年睇好佢哋。」他認為雖然今年取消了3個頒獎禮,但新人們仍然是值得嘉許。許廷鏗指見到MIRROR、ERROR的歌迷,便會想起當年的自己。問他會否考慮轉走韓風路線吸納更多樂迷?許廷鏗自嘲說:「我都係『韓』風,寒冷個寒呀。我做新人嗰陣(最受歡迎)係Eason,有種獨特嘅港味,希望自己可以保持住。」他直言近年香港樂壇少了港味:「係有少少咁嘅趨勢,不過我有首以2000風格嘅歌《將心比己》,係成隻碟反應最好嘅,證明大家仲有廣東歌嘅根,港味係值得保留同保存,希望自己可以盡少少能力。」至於他的歌《我們與愛的距離》打入叱咤十強,他笑言要盡力拉票,亦希望在不同平台同樣得到大家喜愛。

「勁爆新人獎」由李靖筠、林穎彤及陳凱詠奪得,李靖筠認為有獎是個肯定,但不會強求。問她有何優勝之處?李靖筠認為自己的歌聽起來很舒服,她又笑謂:「同埋我靚囉,得獎對公司有交代,同事付出咗好多,我講幾多多謝都唔夠,請食飯呢啲基本啦,要開個party慶祝。」另外,問到好友吳浩康與崔碧珈突然分手,李靖筠說:「好可惜,不過佢就嚟開演唱會,希望佢放緩心情加把勁,我有message佢,佢話OK。」鄺星宇、葉冬賢及林晴恩雖然未有獲獎,但能現場獻唱感興奮,林晴恩表示很喜歡同場的陳柏宇,希望有機會集郵。

娛聞樂陪你走遍全球追星,即Like「娛果」FB 專頁!
BannerBanner