【黃色娛樂圈】樂壇新人莊正涉暴動罪 仍不忘撐廣東話

更新時間 (HKT): 2019.12.19 18:36
互聯網圖片

28歲樂壇新人莊正,等了5年才有機會出新歌,惟上月18日涉圍理大被捕,被控暴動罪,雖然前途未卜,但莊正卻沒放棄對唱歌的夢想,日前在社交網上載自彈自唱《怕死》短片,多謝大家對他的支持。

鍾意唱歌的莊正,前日在社交網留言撐廣東話和廣東歌:「喺以前,甚至最近今年年頭,我對語言被消滅都冇咁深感受,或者可能好多人對香港都冇特別深感受,冇真係對自己嘅身份咁執着,直到有次我有機會入啲中學,我發現最少有7成(好大機會更多)嘅學生係講普通話,嗰陣反送中都未開始,我嗰陣意識到我哋仲講緊廣東話嘅,好可能真係最後一代『香港人』,呢個『香港人』係講緊,係仲活喺呢種價值觀同文化下嘅一個身份,唔係單單住喺呢個地方。」

莊正坦言到反送中開始,對香港多了歸屬感:「以前我諗大部份人包括我,冇特別諗嘅原因應該係,根本冇諗過有啲一路享受緊嘅自由,係真係有機會失去,到真係feel到俾人搶走緊一啲嘢就會咁大反應,所以見到嗰啲黃色經濟圈係好感動(但好抱歉我冇咩能力消費),有次見到個外國人,紋咗香港區旗喺身(講緊幾年前),我仲笑點解鬼佬紋香港,係咪真係咁鍾意香港。其實我應該笑嘅係自己,點解一個外國人鍾意香港到要用紋身去記錄,我土生土長反而要笑人!所以我有機會一定都會紋一個關於呢個地方嘅嘢上去。」

網民紛紛留言鼓勵莊正,鄭敬基亦表支持:「撐廣東歌撐香港人,你加油」!

娛聞樂陪你走遍全球追星,即Like「娛果」FB 專頁!
BannerBanner