【可能騷擾到人】Aka凌晨喺森林拍MV撞瘀 有警察到場了解

更新時間 (HKT): 2019.12.20 21:54
攝影:盧妹

劉心悠、趙慧珊(Aka)、張新悅及方建儀等今晚到尖沙嘴文化中心出席經典芭蕾舞劇《胡桃夾子》開幕夜。心悠以格仔短裙現身,皮膚明顯黝黑及大隻不少,她笑謂:「你哋覺得我大隻咗咩?我覺得自己細隻咗,因為之前拍黃子華做導演嘅《乜代宗師》要做拳手,要操大隻。」

心悠透露為了增肌,要吸收蛋白質:「我人生第一次咁做,train幾個月,仲要曬黑,都係為咗個角色。我自己都接受到黑嘅,因為平日練跑都會曬到有印,但係曬燈就平均啲囉。」劉心悠除了操肌亦要練拳,坦言操練期間經常被人打:「成日都被人撼頭。第一日輕輕俾人撞,我已經流晒眼淚,其實都係要練大個膽,日日都好過癮,好似搭船咁。」

首次與黃子華合作的心悠好開心:「佢好關心打拳,仲分享好多打拳嘅嘢畀我,叫我睇多啲新聞了解下。」記者笑指是否因為靚女才獲子華特別照顧?劉心悠說:「唔係呀,我諗佢想我快啲投入角色。」她又透露希望到白色地方過聖誕,如果未能出埠,便留於家中陪家人度過。

Aka自小學芭蕾舞,因此每年聖誕節都會欣賞《胡桃夾子》:「自己都有參與過演出,大約12、3歲嗰陣。我有做話唔同角色,記得扮老鼠要戴頭笠,真係有中暑嘅感覺。」她笑謂當時演出有酬勞,但全數交給媽媽。Aka透露曾經因為跳芭蕾舞受傷,左腳腳筋發炎,食了很長時間的消炎藥。

受訪時,Aka左邊面隱約看到瘀傷,她說:「應該係拍MV嗰陣整到,因為要喺森林跳舞,嗰時係凌晨,黑麻麻乜都睇唔到,成個人仆低咗。」她自爆因拍攝時,可能騷擾到附近民居,有警察到場了解,因此當時很心急完全拍攝。

採訪、攝影:盧妹

娛聞樂陪你走遍全球追星,即Like「娛果」FB 專頁!
BannerBanner