【爆相爆片】洪欣素顏晒名牌手袋 蹺老公行街走過婚變陰霾

更新時間 (HKT): 2019.12.20 06:00

48歲洪欣和老公張丹峰結婚多年,今年初傳張丹峰背妻出軌,搭上了經理人畢瀅搞曖昧,令婚姻現暗湧,最後張丹峰箍煲成功,更豪擲150萬買靚跑冧老婆;跨過婚變危機的洪欣,日前孖老公拍拖行銅鑼灣,被讀者吳先生透過「爆相爆片」分享夫妻日常,洪欣雖然着T恤牛仔褲,但就襯H字頭名牌手袋,即時提升格調。

吳先生接受《蘋果》電話訪問表示,當日下午約4時半,在銅鑼灣見到洪欣和老公一齊行街:「佢哋途經一間藥房,見到洪欣喺門外問咗店員幾句,之後佢哋去咗一間零食店,張丹峰陪老婆入去行咗一圈,其後唔耐煩,自己走出門外食咗支煙,洪欣一個人喺裏面慢慢揀糖,見到佢買咗袋98蚊一磅嘅軟糖,買完糖之後,兩個好恩愛咁向跑馬地方向走。」

從讀者提供「爆相爆片」所見,素顏的洪欣和老公蹺手行返屋企,沿路有傾有講,明顯已經走出婚變陰霾,享受平淡是福的生活。

娛聞樂陪你走遍全球追星,即Like「娛果」FB 專頁!
BannerBanner