【遭同屆佳麗排斥】朱晨麗自爆因唔識講廣東話被圍攻:大獎唔會畀你

更新時間 (HKT): 2019.12.28 14:16

朱晨麗近期在劇集《多功能老婆》上的演出受到讚賞,日前她接受商台訪問,提到在2011年成為四料港姐冠軍後入行,當年朱朱在參選其間有「翻版陳法拉」之稱,但這個稱號並沒有為她帶來好處,反而因為不懂得廣東話而受歧視及冷言冷語:「其實參選嗰陣只係諗住吸收經驗,從來都冇諗過會攞冠軍,傳說所有女仔、同屆一齊選嘅女仔,個個都兜口兜面咁同我講『選港姐梗係選一個識講廣東話嘅人,唔通選你咩!』不過我又冇乜所謂,事實上我自己都覺得冇理由選我出嚟,我又唔識講廣東話,把鬼咩!」她還說:「仲有啲女仔話我契爺乜乜乜,即係有啲background喇,咁我自己諗諗吓,又係喎,我自己又冇背景,提名人只不過係一個朋友仔,應該都唔會中!」

朱朱還笑説:「嗰陣當闖關咁,過完一關又一關,好似有一個好多item嘅表演,我盡力去做,最後選中咗我,有個細獎喇,點知又話係豬肉獎,大獎唔會畀你㗎!成日都有呢啲聲音,不過聽完我都覺得佢哋啱,所以最後志偉哥拖住我媽咪出嚟嘅時候,覺得有冇搞錯?係冇可能嘅事!點知真係成為冠軍,真係冇黑幕,感恩!感恩!」朱朱為了苦練廣東話,她經常流連茶餐廳:「嗰陣唔同人溝通,怕人哋唔明白我講乜而覺得好尷尬,所以成日都企埋一邊,好似自閉,之後去茶餐廳偷聽人哋點樣講嘢,呢樣算係可以更地道、更貼近生活。」

當選後朱朱被安排拍劇,接替受傷的陳法拉演出《名門望族》,朱朱說:「嗰陣碰咗好多釘,有好多笑話,當然有開心同唔開心,開心係人哋見到我唔識講而取笑嘅開心,咁我又覺得大家開心我又幾開心喎,但係有啲唔開心嘅係,好努力去背廣東話,出嚟效果又唔好,對手都唔明你講啲乜,嗰陣我幾乎日日都唔瞓覺,角色好重戲份,直到劇集出街,真係好沮喪,好多鋪天蓋地嘅負評,好多平台都見到我個名,不過係唔好嘅嘢,唔止馬明同卓羲啲fans,連其他fans都轟炸我,我只係一個新人,點解承受咁大壓力?」最後朱朱只有用喊去宣洩:「我冇乜朋友,又唔想同屋企人去傾,佢哋實會叫我返屋企,所以要學識點樣去疏導自己。」至於何廣沛的關係,她說:「而家我哋係好好嘅朋友,唔可以話我哋冇機會發展,不過而家我好有事業心。我好傳統,諗過40歲前會結婚生仔,而家我係單身,未知Mr. Right出現未。」

娛聞樂陪你走遍全球追星,即Like「娛果」FB 專頁!
BannerBanner