【脫離病魔】林欣彤夢想成真 處女騷搵爸爸做嘉賓

更新時間 (HKT): 2019.12.28 10:53

林欣彤上年因為聲帶問題延期的音樂會,昨晚終於夢想成真,在旺角麥花臣舉行首個賣票的音樂會《MAG IN THE MIRROR》,全場爆滿。林欣彤的好友田蕊妮、吳業坤、許廷鏗、鄭欣宜、鄧小巧、方皓玟、陳家樂及陳慧敏等亦到場支持,緋聞男友天堂鳥的Tyrese亦低調捧場。

晚上約八時半,穿上薄紗長裙的林欣彤赤腳步出舞台,邊走邊清唱試聲,帶觀眾進入她的音樂世界。換上花花閃片裙的林欣彤向觀眾打招呼:「等咗好耐啦,真係等咗好耐啦。你哋有冇人買咗上年嘅飛呀?」台下即歡呼起哄,她感謝大家支持。

林欣彤一直未有透露的演唱會嘉賓,原來就是林爸爸,她說:「佢係我成世人第一個同我唱卡拉OK嘅人,成日播歌畀我聽、唱歌畀我聽,有時仲彈琴畀我聽添,今晚我想送一份禮物畀佢。」她隨後獻唱《非同兒戲》送給爸爸,林爸爸更現身舞台,兩人手拖手合唱張國榮的《今生今世》,台下掌聲不絕。

唱畢,林欣彤鬼馬問爸爸是否滿意,林爸爸說:「滿意。」她即撒嬌說:「你要話唔滿意,因為我咁先會更努力,去更大嘅場地開騷。」林欣彤坦承自己,很少向父母傾訴煩惱和壓力:「可能我喺佢哋面前逞強,想去保護佢哋,因為我真係好驚佢哋會擔心我,其實Daddy已經送咗最好嘅特效藥畀我,就係音樂,你哋放心,我會繼續堅強行落去。」

林欣彤分享自己的內心世界,她不介意與大家分享她的高高低低,惟獨愛情世界不知道如何分享:「唔知可以點講,好想將佢收埋喺樹窿入面,所以請容許我唱出黎。」說罷,她獻唱《忍》、《食物鏈》、《重光紀念日》及《懸崖花》。

林欣彤再分享自己低潮時的心路歷程,經歷情緒病、失聲,而身體亦起毛病,當時的她連匙羹亦拿不到:「上年呢個時候好瘦,因為受病魔煎熬,講唔到嘢,因為個身太痛,都有問自己點解要經歷呢啲。」她當時樂天地想,或許是上天讓她以公眾人物的身而家分,安慰與她同病相憐的人,林欣彤宣佈:「我冇事啦。」

隨後,她又感觸地指高處的風景未必最美,低處更美,因為身邊的愛就是最美的風景:「低潮一定會捱過,只係辛苦啲啫,希望大家加油!」說罷,林欣彤唱出《我們都是這樣長大的》。

唱到《追風箏的風箏》時,林欣彤感動到眼濕濕,她說:「我望住Daddy唱歌就好想喊,一喊就好難聽㗎啦嘛,唔可以喊㗎。」她帶領台上的樂手向觀眾鞠躬。原本音樂會已完結,但觀眾不肯離去大叫encore,林欣彤再度出場獻唱《鳥籠》,又與全場觀眾大合照,音樂會於晚上十時五十分圓滿結束。

完騷後,林欣彤對於夢想成真感到興奮:「鬆咗一口氣,冇諗過second encore都咁多人。」她笑謂剛剛完騷時,差點忍不住落淚,但自爆綵排時在台下看到爸爸唱歌,便感動到哭:「今晚揀咗《今生今世》同佢唱,因為我覺得今世有佢做我Daddy好幸福,我好想送呢份禮物畀佢,就係喺個大台上面好多人聽到佢唱歌。」

林欣彤表示會向紅館進發,至於聲帶已康復8、9成:「雖然未好返100%,媽咪都成日煲羅漢果畀我飲,今日Alfred(許廷鏗)都有煲羅漢果畀我。」至於緋聞男友Tyrese亦有到場支持,林欣彤表示多謝對方前來,問到為何不邀請他上台合唱?她說:「咁我要邀請好多歌手,今晚好多人黎咗。佢唔係咩特別身份,都係普通朋友。」音樂會上她提到身體痛至不能拿匙羹,林欣彤坦言因情緒病復發所致:「嗰時我講野就痛,上半身都痛,而家穩定咗、控制緊,好好。」她又表示會休息數天,與好姊妹外遊放鬆。

娛聞樂陪你走遍全球追星,即Like「娛果」FB 專頁!
BannerBanner