【真係4月播?】林文龍拍心口幫無綫劇宣傳 希望娛樂圈團結有交流

更新時間 (HKT): 2019.12.29 21:11

林文龍今日以候任亞視副總裁身份,一家三口到大埔出席亞姐總決賽。今年4月才在無綫拍劇《那些我愛過的人》,未夠一年就升格成為亞視高層,林文龍要面對的挑戰不少,其中亞視不時都傳出財困,林文龍今日再派定心丸:「呢個大前題(解決財困)一定要啦,如果我上任,呢個內部問題都冇解決到啲話,咁我點上任呀?」我上任都要釋除咗大家嘅疑慮,其實我嘅大前提係……我會覺得大家去做嗰份工作呢,係必須要去好開心、好享受,咁先可以做到一件好事出嚟嘅,咁如果你話之前嗰啲強積金又斷供呀嗰啲,最基本嘅嘢我覺得要處理咗先吖,所以據我了解,係唔需要擔心呢啲嘢。」

《那些我愛過的人》煞科半年,遇上林文龍過檔,有傳該劇將在下年4月出街,林文龍會否返無綫宣傳?他大方答應:「可以!喺我個角度呢……我唔知TVB點睇啦,我其實覺得成個娛樂圈呢,大家應該係團結嘅,大家應該係百花齊放嘅。咁我之前幫佢拍落嘅嘢,如果佢有需要我幫手宣傳,我絕對願意配合嘅,咁我覺得其實就算大家係唔同公司,有好多嘢係可以交流囉。」老婆郭可盈亦附和:「而家年代都唔同啦,以前8、90年代就存在住競爭,但係而家唔存在住呢兩個字喺度,反而係大家都想做啲好嘅製作出嚟,得益嘅都係觀眾。」

雖然無綫出名小器,但林文龍不擔心新劇會成倉底貨:「咁呢個唔到我擔心喎,你諗吓,就算我而家冇過到去,正如你哋同我講佢排咗4月(播),唔代表佢真係4月出街㗎嘛。你諗吓TVB咁多存貨,其實個倉底大把選擇喺度,咁其實之前都有好多劇拍完都冇出街㗎啦,咁所以作為一個演員,我覺得呢樣嘢係被動嘅,你係唔會預計得到嘅,所以亦都唔需要擔心,只係做好自己嘅份內事,用一個平常心去睇就已經OK。」

而日前朱咪咪爆響口原來《陀槍師姐》會拍第五輯,林文龍在第四輯加入,今次開續集他就落閘拒絕:「就應該唔得喇,因為我上任咗之後,唔會有幾個月時間嚟拍,咁但係如果TVB會邀請嘅話,首先我會好感謝、好多謝。」

娛聞樂陪你走遍全球追星,即Like「娛果」FB 專頁!
BannerBanner